Delegacioni i Bashkimit Evropian dhe Zyra e Koordinatorit të Përhershëm të OKB-së organizuan konkurs oratorik në Europe House Manastir për të shënuar 75 vjetorin e Deklaratës Universale të të Drejtave të Njeriut, duke përmbyllur fushatën 16 Ditë të aktivizmit kundër dhunës me bazë gjinore, të nisur më 25 nëntor në Shkup e organizuar bashkërisht nga BE, OKB dhe OSBE.
Ngjarja u hap me fjalimin e Ben Nupnau, zëvendës Shef i Delegacionit dhe Rosana Duxhiak , Koordinatore e Përhershme e OKB-së. Z. Nupnau theksoi nevojën për veprim në mbrojtjen e të drejtave të njeriut, duke vërejtur: “Përkujtimi i Deklaratës Universale këtë vit është thirrje për veprim, përkujtues i përgjegjësisë sonë kolektive dhe individuale për të mbrojtur të drejtat bazë të tona dhe të të tjerëve”. Znj. Duxhiak theksoi rëndësinë e përdorimit të zërit tonë në mbrojtjen e të drejtave të njeriut dhe rolin kritik të angazhimit të të rinjve, duke thënë: “Është mjeti kryesor që ju lejon të zgjidhni çështjet që prekin komunitetin, kombin dhe botën tuaj. Nga të pastrehët tek ndryshimet klimatike, ne mund t’i trajtojmë të gjitha, nëse përdorim zërin tonë. Përveç kësaj, duhet t’i kemi të rinjtë të angazhuar në shoqëri dhe të jenë të zëshëm për çështjet me të cilat përballet komuniteti i tyre”.
Konkursi oratorik, i mbështetur nga Europe House në Shkup dhe Manastir në bashkëpunim me klubin e oratorëve të rinj Forum Oratores, përfshiu gjashtë finalistë, të zgjedhur nga një thirrje e hapur e shtrirë fakulteteve juridike nga Shkupi, Shtipi dhe Manastiri. Oratorët e rinj, të cilët iu nënshtruan një trajnimi gati 6-javor në aftësi oratorike, të folurit publik dhe përpilimin e fjalimeve, shfaqën aftësitë e tyre dhe kuptimin e thellë të çështjeve të të drejtave të njeriut duke u paraqitur me fjalimet e tyre mbi temat që shtrihen nga barazia gjinore deri tek të drejtat e fëmijëve.
Pas një diskutimi të kujdesshëm, juria përzgjodhi Juliana Gjorgovën si interpretuese të spikatur, duke i dhënë vendin e parë. Vendet e dyta dhe të treta u siguruan nga Bojana Burçeska dhe Hristina Garabiljeviç, respektivisht. Ceremonia oratorike përfshiu edhe shfaqje jokonkurruese nga fituesit e fundit të konkursit oratorik nga të njëjtat 3 fakultete.
Kjo ngjarje shërbeu jo vetëm si platformë për zërat e rinj mbi të drejtat e njeriut, por edhe si përkujtues për rëndësinë dhe vlerën e Deklaratës Universale të të Drejtave të Njeriut ndërsa reflektojmë në 75 vjetorin e saj.
