Lidhja hekurudhore midis Shkupit dhe Prishtinës mund të realizohet deri në fund të vitit të ardhshëm, pasi Kosova të përfundojë punimet në infrastrukturën e saj hekurudhore, paralajmëroi zëvendëskryeministri dhe ministri i Transportit, Aleksandar Nikolloski. “Për Shkup-Prishtinë, kemi një lidhje hekurudhore, modernizimi po bëhet në anën e Kosovës, ka një tunel tjetër që duhet të përfundojë. Kam zhvilluar dy takime me ministrin e Transportit gjatë muajit të kaluar, në mënyrë që kur të përfundojnë pjesën e tyre, treni të jetë në gjendje të funksionojë”, tha Nikolloski në podkastin “Ku janë paratë?”.
Ai tha se pjesa më e madhe e rrugës në territorin e Maqedonisë do të jetë pjesë e zgjerimit të ardhshëm të trenit urban në Shkup. “Tani lëshuam rrugën e parë nga Zelenikova deri në Hekurudhën e re, rruga e dytë duhet të jetë nga Hekurudha e re në Vollkovë dhe Gjorçe Petrov dhe e treta duhet të jetë nga Hekurudha e re në Ilinden dhe Agino sello”, tha ministri.
Sipas Nikolloskit, lidhja hekurudhore me Prishtinën mund të ketë një efekt të rëndësishëm në trafik dhe të ulë ndotjen e ajrit në Shkup.
“Aktualisht, 30% e automjeteve në Shkup vijnë nga perëndimi, 30% vijnë nga lindja dhe pjesa e mbetur diku rreth 40% vjen nga veriu. Ka shumë migrim ditor mbi 10.000 automjete shkojnë dhe vijnë nga Kosova çdo ditë dhe nëse arrijmë t’i bëjmë të hipin në një tren dhe të shkojnë nga qendra e Prishtinës në qendër të Shkupit saktësisht në 50 minuta, jam i bindur se kjo do të ndikojë në uljen e ndotjes në Shkup”, theksoi Nikolloski.
Ai shtoi se realizimi i lidhjes hekurudhore Shkup-Prishtinë në anën e Maqedonisë do të zgjasë rreth 4 deri në 6 muaj pas përfundimit të punimeve në Kosovë dhe pritja është që linja të jetë funksionale deri në fund të vitit të ardhshëm.
Shqip