Richard Lee Richards me karrocën e tij të motorizuar të invalidëve, ishte nisur drejt hyrjes së një dyqani në Tuscon të SHBA-ve, kur një polic prapa tij nxori revolen.
Disa momente më pas, punonjësi i dyqanit fqinj – Walmart njoftoi policinë se ka parë Richardsin duke vjedhur një kuti me vegla pune.
Punonjësi dhe polici Ryan Remington përcollën Richardin deri në parking në drejtim të një dyqani tjetër. Madje policia tha se në një moment Richards i është vërsulur punonjësit me një thikë, duke bërtitur “ja fatura”.
Remington i kishte bërtitur duke e urdhëruar që të mos futet në dyqan dhe ishte nisur në drejtim të Richardsit, ku pa kurrfarë paralajmërimi shkrepi nëntë plumba mbi 61-vjeçarin që u godit në shpinë nga afër – duke mbetur i vdekur në vend, shkruan Washington Post.
Shefi i policisë në Tuscon, Chris Magnus, tha para gazetarëve se policia është e vendosur që ta shkarkoj Remingtonin.
“Të jem i qartë, më kanë prekur thellë veprimet e policit Remington. Përdorimi i forcës vdekjeprurës në këtë incident është qartë shkelje e politikave të kësaj njësie dhe drejtpërdrejt kontradiktore nga ajo çfarë mësohet në trajnime sa i përket përdorimit të forcës”, shtoi ai.
E kryetarja e qytetit Tucson, Regina Romero, ka vlerësuar se vrasja e Richardsit është e “paarsyeshme” – duke kërkuar me urgjencë të kryhen hetime.
Mediat lokale raportojnë se Richards në vitin 2007 ishte dënuar me 10 vite burgim për tentimvrasje, sikurse edhe në vitin 2019 kur pranoi se është marrë me kontrabandimin e emigrantëve – ku u dënua me më shumë se një vit burgim.
