Kryetari i Komunës së Butelit dhe kandidat i VMRO-DPMNE-së për një mandat të dytë, Darko Kostovski, ka njoftuar fillimin e ofensivës më të madhe ndërtimore në Shkup-Veri, me investime që arrijnë në 65 milionë denarë.
“Sot fillojmë me realizimin e projekteve të mëdha që do ta ndryshojnë pamjen e tërësishme të Shkupit Verior,” ka shkruar Kostovski në një postim në rrjetet sociale.
Sipas tij, projekti parashikon rindërtimin e plotë të rrugës “Boro Menkov”, përfshirë trotuaret, shtigjet për këmbësorë dhe parkingjet paralele, ndërsa në një pjesë të rrugës do të ndërtohen edhe vende të reja parkimi.
Gjithashtu, do të rindërtohet rruga “Kosturska” me dy hapësira të mëdha parkimi dhe shtigje hyrëse, si dhe për herë të parë do të ndërtohet trotuar i ri për lëvizje të sigurt e të lirshme të qytetarëve.
Në kuadër të investimit janë përfshirë edhe 40 shtigje hyrëse drejt ndërtesave, që do të shtrihen në rrugët “Boro Menkov”, “Kosturska”, “Lazo Moskov” dhe “Goce Stojçevski”.
Një pjesë tjetër e projektit përfshin ndërtimin e parqeve të reja dhe vendosjen e pajisjeve urbane moderne në disa zona të vendbanimit Shkup-Veri.
“Kjo është ofensiva më e madhe ndërtimore që ka nisur ndonjëherë në Shkup-Veri. Po punojmë me përkushtim për ju dhe për të ardhmen tuaj,” ka theksuar Kostovski.
Ky projekt, sipas Kostovskit, është dëshmi se Buteli po zhvillohet me hapa të sigurt dhe me vizion të qartë për të ardhmen.
Shqip