Prof. dr. Omer Xhemali, me origjinë nga Tetova, është drejtor i Klinikës së Kirurgjisë së Zemrës në Spitalin Universitar të Cyrihut, në Zvicër. Ai e mori këtë detyrë më 1 dhjetor 2022, ndërsa veprimtaria e tij profesionale përfshin kirurgjinë, mësimdhënien dhe kërkimin shkencor.
Xhemali është gjithashtu drejtues i Aleancës për Kirurgjinë e Zemrës në Cyrih, ku bashkëpunojnë Spitali Universitar dhe Spitali i Qytetit të Cyrihut.
Rrugëtimin në mjekësi e nisi në Sarajevë, ndërsa më pas vazhdoi studimet në Universitetin “Johannes Gutenberg” në Mainz të Gjermanisë, ku doktoroi në vitin 2000. Karrierën profesionale e vazhdoi në Klinikën Universitare në Frankfurt, përpara se të vendosej në Zvicër.
Që nga viti 2009, Xhemali ka mbajtur pozita drejtuese në Spitalin Triemli në Cyrih, ndërsa në shtator të vitit 2018 mori drejtimin e kirurgjisë së zemrës në këtë institucion. Me Spitalin Universitar të Cyrihut bashkëpunon që nga viti 2016.
Fushat e tij të specializimit përfshijnë operacionet minimale invazive të zemrës, kirurgjinë e valvulës mitrale dhe kirurgjinë rindërtuese. Ai ka përvojë edhe në ndërhyrjet klasike në zemër dhe në kirurgjinë e transplantimit.
Përveç angazhimit të tij në Zvicër, Xhemali mban lidhje edhe me komunitetin akademik në Maqedoninë e Veriut. Universiteti i Tetovës i ka ndarë titullin doktor honoris causa në vitin 2015, ndërsa në vitin 2023 ai fitoi të drejtën për të dhënë mësim në Universitetin e Cyrihut.
Shqip