Doganierët në Tabanoc, Qafëthanë dhe Bllacë do të pajisen me kamera trupore, të cilat do të regjistrojnë kontrollet dhe veprimet zyrtare në pikat kufitare.
Drejtoria e Doganave ka marrë 30 kamera trupore si donacion përmes ICITAP-it amerikan. Pajisjet synojnë të rrisin transparencën dhe kontrollin gjatë procedurave doganore, por edhe të ofrojnë mbrojtje shtesë për qytetarët dhe punonjësit.
Regjistrimet mund të përdoren si dëshmi dhe, kur është e nevojshme, të shkëmbehen me institucionet kompetente të zbatimit të ligjit.
Drejtori i Doganave, Boban Nikollovski, tha se sistemi i ri pritet të kontribuojë në rritjen e profesionalizmit, përgjegjësisë dhe sigurisë, si dhe në parandalimin e korrupsionit dhe keqpërdorimit të autorizimeve zyrtare.
Sipas tij, kamerat do të jenë veçanërisht të rëndësishme në tri pikat kufitare, ku çdo ditë ka një numër të madh udhëtarësh, transportuesish dhe qarkullim të mallrave.
U.d. ambasadore e SHBA-së, Nicole Warns, deklaroi se teknologjia moderne do t’u mundësojë doganierëve t’i kryejnë detyrat me më shumë integritet, ndërsa SHBA-ja do të vazhdojë të mbështesë forcimin e sigurisë së kufijve.
Shqip