Shkruan:Etem Xheladini
Të dashur nxënës e studentë, të nderuar punëtorë të arsimit, ju misionarë të dijes dhe të së ardhmes sonë. Nëse nisemi nga dy të vërteta të mëdha: “Padituria është rrënja e së keqes, ndërsa ARSIMI është çelësi i së mirës!“, atëherë, sot, më shumë se kurrë, zgjedhja është në duart tuaja. Ju mund të zgjidhni rrënjën e së keqes, paditurinë, ose çelësin e së mirës, arsimin, dijen dhe edukimin. Sepse arsimi nuk është thjesht marrje njohurish. arsimi është formësim i karakterit, kultivim i mendjes, ndërtim i personalitetit dhe përgatitje për një shoqëri më të drejtë, më të qytetëruar dhe më të përgjegjshme.
Prandaj, jo rastësisht thuhet: “ARSIMI ËSHTË MBI TË GJITHA!“. Sepse një shoqëri që investon në arsim, investon në të ardhmen e saj, ndërsa një shoqëri që e nënvlerëson dijen, rrezikon të humbasë jo vetëm drejtimin, por edhe perspektivën e saj. Dhe le të mbetet gjithmonë e gjallë edhe kjo porosi e fuqishme: “ARSIMI S’DURON NËNSHTRIM”, sepse mendja e arsimuar pyet, kërkon, hulumton, analizon dhe nuk pranon verbërisht asgjë. Dija e çliron njeriun nga paragjykimet, nga frika dhe nga padituria. Ajo i jep guxim të mendojë lirshëm, të gjykojë me arsye dhe të veprojë me përgjegjësi.
Të dashur nxënës e studentë, mos e shihni shkollën vetëm si një detyrim, një obligim apo një hap drejt një diplome. Shiheni atë si një nga mundësitë më të mëdha për të ndërtuar veten, për të zbuluar potencialin tuaj dhe për të ndryshuar të ardhmen tuaj. Çdo faqe që lexoni, çdo njohuri që fitoni dhe çdo pyetje që bëni, është një hap më tej drejt një njeriu më të ditur, më të lirë dhe më të përgjegjshëm.
Të nderuar mësues, profesorë dhe punëtorë të arsimit, misioni juaj është shumë më i madh se një profesion. Ju nuk përcillni vetëm dije, ju mbillni ide, ushqeni mendje, ndërtoni karaktere dhe formësoni brezat që do të ndërtojnë të ardhmen. Në duart tuaja nuk është vetëm një libër, në duart tuaja është e ardhmja e një brezi.
Prandaj, le ta nisim çdo vit shkollor me besim, përkushtim dhe përgjegjësi, me bindjen se çdo libër i hapur është një derë e hapur, çdo mësim i mësuar është një hap përpara dhe çdo përpjekje për dije është një investim në një të ardhme më të mirë. Sepse kombet dhe shoqëritë nuk ndërtohen vetëm me rrugë, ndërtesa e institucione. Ato ndërtohen para së gjithash me njerëz të arsimuar, me mendje të ndriçuara dhe me karaktere të forta.
Në një botë që ndryshon me shpejtësi, dija nuk është luks, dija është nevojë. Arsimi nuk është privilegj, arsimi është themel. Dhe mësuesi nuk është vetëm profesionist, mësuesi është ndërtues i së ardhmes.
Ju uroj nga zemra çdo fillim të mbarë shkollor, shëndet, vullnet, këmbëngulje, suksese dhe sa më shumë arritje në rrugën e dijes. Mësoni sot, që të mund të udhëhiqni të nesërmen, mendoni lirshëm, që të mund të ndërtoni drejt. Zgjidhni dijen, sepse ajo është çelësi i së mirës!
ARSIMI NUK ËSHTË THJESHTË E ARDHMJA, ARSIMI ËSHTË FORCA QË E NDËRTON ATË, TË ARDHMEN
Shqip