Studentët e drejtësisë nga Universiteti i Tetovës, ai i Europës Juglindore dhe Universiteti “Nënë Tereza” do të mblidhen të hënën, më 6 prill, në “Urën e Gurit” në Shkup. Organizatorët thonë se ky marsh vjen si pasojë e “padrejtësisë sistematike” që zgjat prej vitesh.
‘E drejtë vetëm në letër’
Sipas organizatorëve, megjithëse përdorimi i gjuhës shqipe në institucione është i garantuar me ligj dhe Kushtetutë, zbatimi i tij në provimin e jurisprudencës — i cili është kusht për t’u bërë avokat apo gjyqtar — mbetet i bllokuar në praktikë.
“Studentët e drejtësisë vazhdojnë të përballen me një pamundësi të vazhdueshme,” thuhet në deklaratën e përbashkët të unioneve. “Kjo është një e drejtë e garantuar, por e mohuar në praktikë prej vitesh.”
Detajet e protestës:
• Vendi: Ura e Gurit, Shkup.
• Koha: 6 Prill, ora 12:30.
• Kërkesa kryesore: Sigurimi i menjëhershëm i kushteve për testim në gjuhën shqipe.
Pse ka rëndësi?
Gjuha mbetet një çështje e ndjeshme politike dhe juridike në Maqedoninë e Veriut. Edhe pse Ligji për Përdorimin e Gjuhëve ka avancuar statusin e shqipes, barrierat teknike dhe administrative në provimet profesionale shihen nga aktivistët si formë e margjinalizimit të kuadrove të reja shqiptare.
Unionet studentore u kanë bërë thirrje organizatave të shoqërisë civile dhe mediave që të monitorojnë protestën, duke e cilësuar rolin e tyre si “katalizator për ndryshim shoqëror”. (INA)
Shqip