Drejtoria e Policisë Financiare njofton se më 28.08.2025, në pikën kufitare “Bllacë e Poshtme”, gjatë përpjekjes për të hyrë në RMV, është privuar nga liria S.A., shtetas i Republikës së Kosovës, për të cilin ekziston dyshimi i bazuar se ka kryer veprën penale “Bashkim kriminal” (neni 394, paragrafi 2) dhe veprën penale “Shmangie tatimore” (neni 279, paragrafi 3), transmeton Portalb.mk.
Nga ana e personave të autorizuar zyrtarë të Drejtorisë së Policisë Financiare, personi menjëherë është arrestuar dhe është sjellë para gjyqtarit për procedurë paraprake, ku i është caktuar masa e paraburgimit prej 30 ditësh, pas së cilës është dërguar në Burgun e Kumanovës.
Paraburgimi është vazhdim i aksionit të 25 gushtit, kur u paraburgosën shtatë persona, si rezultat i një procedure komplekse para-hetimore të zhvilluar nga Drejtoria e Policisë Financiare, nën udhëheqjen dhe në koordinim me prokurorin publik kompetent nga Prokuroria Publike e Republikës së Maqedonisë, në kuadër të së cilës u ndërmorën një sërë masash dhe aktivitetesh dhe u siguruan prova të shumta, të cilat rezultuan me ngritjen e kallëzimeve penale kundër 13 personave fizikë dhe 10 personave juridikë, për veprat penale si: bashkim kriminal, shmangie tatimore, mashtrim tatimor dhe pastrim parash dhe të ardhura të tjera nga veprat penale, të cilat shkaktuan dëme të mëdha në buxhetin e shtetit në shumën prej mbi 430 milionë denarësh.
Kujtojmë se më 25 gusht, gjatë një operacioni të madh të Policisë Financiare në komunat Likovë, Kumanovë dhe Zhelinë, u zbulua veprimtaria e një grupi kriminal që dyshohet për shmangie tatimore dhe pastrim parash në vlerë mbi 430 milionë denarë. Hetimi dyvjeçar u zhvillua në koordinim me Prokurorinë për Krimin e Organizuar dhe përfshiu kontrolle në disa lokacione. Deri tani janë arrestuar 7 persona, ndërsa një është në arrati.
Shqip