Vetëm 17 vjeçe ishte vajza që u gjet e djegur në veturën e përfshirë nga zjarri në afërsi të vendit të quajtur “Içeva Çeshma”, në Bogdanci. Plusinfo mëson jozyrtarisht se hetuesit po shqyrtojnë dyshimet se e mitura mund të jetë vrarë, ndërsa si i dyshuar potencialisht i lidhur me rastin përmendet i dashuri i saj 21-vjeçar, i cili gjithashtu u gjet i vdekur në vendin e ngjarjes.
Sipas informacioneve jozyrtare të siguruara nga Plusinfo, vajza për një periudhë më të gjatë kohore dyshohet se ishte përballur me dhunë nga i dashuri i saj. Veçanërisht shqetësues është fakti se në fillim të muajit të kaluar ajo e kishte denoncuar atë në polici për sulm fizik.
Atëkohë, Ministria e Punëve të Brendshme kishte njoftuar se 21-vjeçari nga Bogdanci ishte privuar nga liria pas denoncimit se kishte ushtruar dhunë ndaj të dashurës së tij 17-vjeçare.
Sipas njoftimit të MPB-së, më 1 tetor 2026, në orën 01:10, policia nga SPB Strumicë – NJPB Gjevgjeli e kishte arrestuar 21-vjeçarin. Sipas denoncimit, ai më 30 shtator, rreth orës 21:00, në shtëpinë e tij kishte sulmuar fizikisht të dashurën 17-vjeçare.
Për rastin ishte njoftuar prokurori publik nga Prokuroria Themelore Publike në Gjevgjeli, ndërsa MPB kishte paralajmëruar se pas dokumentimit të plotë do të dorëzohej kallëzim përkatës.
Deri më tani nuk ka informacione se si ka përfunduar ky rast dhe nëse ndaj 21-vjeçarit ishte ngritur kallëzim penal.
Ndërkohë, ngjarja tragjike që tronditi opinionin publik ndodhi më 3 nëntor, kur në afërsi të vendit “Içeva Çeshma”, në Gorno Sellë të Bogdancit, u gjetën dy trupa të pajetë.
Trupi i 21-vjeçarit V.G. u gjet pranë veturës së djegur, ndërsa trupi tjetër, plotësisht i karbonizuar, u zbulua brenda automjetit. Plusinfo mëson se bëhet fjalë për vajzën 17-vjeçare.
Sipas informacioneve jozyrtare dhe ende të pakonfirmuara, 21-vjeçari ishte gjetur i varur pranë veturës.
Rrethanat në të cilat ka ndërruar jetë vajza ende nuk dihen. Duke qenë se trupi i saj ishte djegur, përgjigjet kryesore pritet të dalin nga autopsia dhe ekspertizat e tjera mjekoligjore.
Shqip