Dy muaj pasi erdhi në krye të Komunës së Tetovës, kryetari Bilall Kasami, ngriti çmimet e parkingjeve në qytet. Kasami tha se me këtë nuk do të dëmtohet xhepi i qytetarëve, por do të kontribuohet në vendosjen e rregullit në komunikacion dhe parking.
“Pjesërisht do të ketë rritje, por njëherësh t’i informoj qytetarët që me vendim të Këshillit komunal do të ulet ora e parkimit, për momentin është deri në 10, do të ulet për 1 orë dhe qytetarët në mbrëmje do të kenë një orë më shumë që do të mund të parkohen pa pagesë”, tha Bilall Kasami, kryetar i Komunës së Tetovës
ÇMIMORJA PËR PARKINGJET E MBYLLURA:
ZONA A: Çmimi për një orë nga 30 në 40 denarë
ZONA B: Çmimi për një orë nga 20 në 30 denarë
ZONA C: Çmimi për një orë nga 15 në 20 denarë
Edhe çmimi për parkimin zonal në zonën A dhe B është rritur për 10 denarë. Por kështu nuk ishin premtimet e Kasamit para se ai zë zgjidhej si i pari i Tetovës. Tre ditë para zgjedhjeve lokale u premtoi qytetarëve se parkimi në Tetovë do të jetë falas derisa komuna të gjejë zgjidhjen e problemit me parkingjet.
“Edhe unë këtë po ua them nga studio juaj të gjithë qytetarëve të Tetovës nga moment i ardhjes në Tetovë të Bilall Kasamit deri sa nuk gjejmë parking për çdo veturë nuk do të ketë pagesë të parkingut në Tetovë”, theksoi Bilall Kasami, kryetar i Komunës së Tetovës (14 tetor 2021).
Sipas planit që ka paraparë Komuna e Tetovës për vitin 2022 për zgjidhjen e çështjes së parkingut, është që me buxhetin e komunës të ndërtohen tre garazheve në kate për parking, 2 në Tetovë dhe 1 në Kodrën e Diellit.
