Alergjitë tek fëmijët janë në rritje. Disa kalojnë me hundë të bllokuara, sy dhe fyt të skuqur, por të tjerë kanë edhe vështirësi në frymëmarrje dhe astmë. Në Klinikën e Fëmijëve po trajtohen 15 fëmijë me simptoma të reaksioneve alergjike dhe është shtuar numri i vizitave ambulatore.
Mjekët thonë se një nga arsyet është rritja e përqendrimit të polenit në ajër për shkak të ngrohjes së papritur në këtë periudhë, por edhe ndotjes së ajrit.
“Gjithçka që thithim, ajo që hamë dhe pimë është arsyeja kryesore e rritjes së numrit të personave alergjikë në mbarë botën, nuk është vetëm këtu. Trajtimi fillimisht është ambulator, por në këtë periudhë, në periudhën e pranverës, është rritur numri i fëmijëve që kanë nevojë për trajtim spitalor, laringit të përsëritura, bronkoobstruksione të përsëritura, pra acarime të sëmundjes astmatike”, u shpreh drejtoresha e Klinikës për fëmijë Valentina Cvejoska.
Alergjitë, sëmundjet autoimune dhe malinje janë sëmundje të shekullit 21, të gjitha sulmojnë imunitetin – thotë drejtoresha e Klinikës së Fëmijëve. Hulumtimet tregojnë se rreth 25 për qind e popullsisë së botës vuan nga një sëmundje alergjike.
