Presidentja e Maqedonisë së Veriut, Gordana Siljanovska Davkova beson se pavarësisht faktit që bullgarët nuk përmenden në Kushtetutën e Maqedonisë, ajo u garanton atyre të njëjtat të drejta si tjerëve që tashmë përmenden në të. Maqedonia, sipas saj garanton shumë më tepër të drejta të pakicave se sa disa vende që tashmë janë pjesë e Bashkimit Evropian. Ndryshe nga ne, thotë Siljanovska Davkova, Bullgaria nuk garanton të drejtat e pakicave në një nen të veçantë në kushtetutë, por vetëm në një nen që ndalon çdo lloj diskriminimi mbi çfarëdo baze.
“BE-ja nuk ka një politikë të përbashkët për të drejtat e pakicave dhe nuk është pjesë e të ashtuquajturës acquis communautaire. Për shembull, Franca dhe Greqia janë vende që as nuk e kanë nënshkruar konventën për të drejtat e pakicave, as konventën për gjuhët rajonale dhe lokale. Shumica e anëtarëve të BE-së nuk kanë asnjë fjalë për të drejtat e pakicave në kushtetutat e tyre. Nuk ka garanci për të drejtat e pakicave në Kushtetutën tuaj. E keni vetëm këtë në Nenin 6, një klauzolë antidiskriminimi që thotë se çdo qytetar është i barabartë, pavarësisht nga gjinia, raca, apo përkatësia etnike dhe kombëtare e pakicave”, tha presidentja në përgjigjen e pyetjes së ambasadorit bullgar në Slloveni, Krasimir Bojanov, pse vendosja e bullgarëve në Kushtetutën e Maqedonisë është kontestues nga një perspektivë identitare, pas ligjëratës së saj në Fakultetin Juridik në Lubjanë me temën “Transformimet kushtetuese në rrugën drejt BE-së: Reforma apo inxhinieri kushtetuese?”.
Nëse e analizojmë këtë problem përmes të drejtave dhe lirive të njeriut, shtoi ajo, “ato janë të garantuara plotësisht dhe për të gjithë pa dallim nëse përmenden apo jo në Kushtetutën e Maqedonisë. Por shtoi ajo, të drejtat e maqedonasve në Bullgari nuk respektohen.
“Ka më shumë se 20 vendime nga Gjykata e Strasburgut kundër Bullgarisë, për momentin 14 vendime. Dhe si profesoreshë, kam një pyetje: çfarë lloj gjykate është nëse vendimet e saj nuk janë relevante për çdo vend? Dhe Bullgaria refuzon t’i zbatojë. Muajin e kaluar ose dy muaj më parë, Komiteti për mbrojtjen e të drejtave në Kombet e Bashkuara lëshoi gjithashtu një vendim duke kërkuar që Bullgaria, pra Gjykata e Apelit të lejojë njohjen e Shoqatës maqedonase për çështje të caktuara kulturore. Në vitin 2008, Komisioni i Venecias lëshoi një opinion mbi kushtetutën bullgare, duke rekomanduar që Bullgaria të garantojë të drejtat minimale për pakicat, sepse, ju edhe në Kushtetutën tuaj, ndaloni partitë bazuar në kritere etnike dhe fetare. Kjo është qasja juaj kushtetuese dhe unë nuk kam ndërmend të ndërhyj në këtë, por në rastin e vitit 2021, Komisioni i Venecias përsëri dha një mendim për ligjin për përdorimin e gjuhëve në vendin tim, duke thënë se standardet janë mbi standardet evropiane në mbrojtjen e të drejtave të pakicave”, ka thënë Siljanovska.
Kjo, shtoi ajo, mund të shihet nëse krahasohen këto dy dokumente.
“Pra, ndër të tjera, bullgarëve u garantohen dhe u jepen të drejta të pakicave”, ka thënë mes tjerash Siljanovska Davkova.
Shqip