Pak më pak se 190.000 euro në muaj në shumë bruto është paga më e lartë e paguar gjatë vitit 2025, tregon raporti i Drejtorisë për të Ardhura Publike (DAP). Bëhet fjalë për një pagë të paguar në sektorin e nxjerrjes së qymyrit të gurit.
Kjo pagë, e cila në nivel vjetor tejkalon 2,2 milionë euro, është rreth 2 për qind më e lartë se paga më e lartë e vitit paraprak. I gjithë Top 5 i pagave më të larta në Maqedoninë e Veriut tejkalon 2 milionë euro në vit në shumë bruto dhe të gjitha janë paguar në Shkup. Bëhet fjalë për paga në sektorët e farmacive, tregtisë së duhanit, ushqimit dhe pijeve, spitaleve dhe tregtisë me produkte farmaceutike.
Të ardhurat më të larta jashtë pagës, si të ardhura shtesë, i ka paraqitur një shkupjan i cili vitin e kaluar ka inkasuar pak më pak se 2 milionë euro bruto në nivel vjetor. Në Top 5 figuruan edhe tre të ardhura vjetore mbi një milion euro dhe një e ardhur prej 42 milionë denarësh.
Të ardhurat më të larta nga dividendët i ka paraqitur një banor i Gjevgjelisë, i cili vitin e kaluar ka marrë mbi 4 milionë euro. Një shumë të ngjashme ka paraqitur edhe një banor i Ohrit.
Gjatë vitit të kaluar, sipas raportit të DAP-it, janë përpunuar 863.100 deklarata vjetore tatimore, që është për afërsisht 83.000 më shumë krahasuar me vitin 2024, ose një rritje prej 10,6 për qind.
Të ardhurat bruto të konstatuara janë më të larta për 74,1 miliardë denarë (+13,8%), ndërsa tatimi i konstatuar mbi të ardhurat personale është më i lartë për 4,9 miliardë denarë (+13,9%).
Shqip