Gripi po shënon rritje në Maqedoninë e Veriut, me pothuajse dyfishim të rasteve të raportuara brenda vetëm një jave, sipas raportit më të fundit të Institutit të Shëndetit Publik (ISHP), të publikuar më 5 nëntor.
Gjatë periudhës 26 tetor – 1 nëntor janë regjistruar 116 raste me grip dhe sëmundje të ngjashme me gripin, krahasuar me 61 raste një javë më parë. Kjo paraqet një rritje prej 90,2 për qind. Numri më i madh i rasteve është regjistruar në Tetovë, por sipas ISHP-së, vendi ende nuk e ka kaluar pragun për fillimin e aktivitetit sezonal të gripit.
Sipas të dhënave zyrtare, në Tetovë janë regjistruar 48 raste, në Kumanovë 26 dhe në Shkup 13. Pasojnë Prilepi dhe Gostivari me nga shtatë raste të raportuara.
Rritja më e theksuar vërehet në Tetovë, ku një javë më parë ishin raportuar vetëm katër raste. Tetova dhe Kumanova së bashku përbëjnë pothuajse 64 për qind të numrit të përgjithshëm të rasteve të raportuara në vend.
Shumica e të prekurve, gjithsej 84 persona, janë të moshës 15 deri në 64 vjeç. Te personat mbi 65 vjeç janë regjistruar 25 raste, ndërsa shtatë raste janë raportuar te fëmijët e moshës 5 deri në 14 vjeç.
Analizat laboratorike konfirmojnë se virusi i gripit tashmë është në qarkullim. Nga 47 mostrat e analizuara në ISHP, katër kanë rezultuar pozitive për influencën A, prej të cilave tri të pasubtipizuara dhe një e tipit A(H1)pdm09. Gjithashtu, një mostër ka rezultuar pozitive për koronavirusin SARS-CoV-2.
Megjithatë, jo të gjitha 116 rastet e raportuara janë grip i konfirmuar laboratorikisht. Mbikëqyrja epidemiologjike javore përfshin edhe sëmundjet me simptoma të ngjashme me gripin.
Pavarësisht rritjes së konsiderueshme, ISHP-ja njofton se situata ende është në nivel ndërsezonal. Incidenca e raportuar është 6,3 raste për 100.000 banorë, ndërsa pragu për hyrjen në aktivitetin sezonal është 7,32 raste për 100.000 banorë.
Kjo do të thotë se vala sezonale e gripit ende nuk ka filluar zyrtarisht dhe kulmi i sezonit nuk është përcaktuar. Megjithatë, rritja javore tregon se numri i të sëmurëve po shtohet edhe para fillimit të dimrit.
Që nga fillimi i sezonit 2026/2027, deri më tani janë regjistruar gjithsej 343 raste me grip dhe sëmundje të ngjashme me gripin, prej të cilave 127 në rajonin e Tetovës.
Ndërkohë vazhdon vaksinimi kundër gripit sezonal, i cili ka filluar më 21 tetor. Sipas të dhënave të Drejtorisë për Shëndetësi Elektronike, të përfshira në raportin e ISHP-së, deri më tani me vaksina falas janë vaksinuar 11.629 persona nga kategoritë e rrezikuara.
Vaksinimi falas realizohet përmes qendrave të shëndetit publik dhe shtëpive të shëndetit, ndërsa aplikimi bëhet përmes sistemit elektronik të vaksinimit.
ISHP-ja rikujton se vaksinimi është masa më e rëndësishme për mbrojtjen nga gripi sezonal, veçanërisht për të moshuarit, personat me sëmundje kronike, gratë shtatzëna, fëmijët e vegjël dhe punonjësit shëndetësorë.
Shqip