Shkup, 17 gusht – Në Ditën e Armatës së Republikës së Maqedonisë së Veriut, debati politik u zhvendos edhe te mënyra e emërtimit të saj dhe përfaqësimi i shqiptarëve në strukturat drejtuese. BDI akuzon Ministrinë e Mbrojtjes dhe Qeverinë se po e shtyjnë institucionin drejt një karakteri gjithnjë e më monoetnik, ndërsa kërkon korrigjimin e emërtimit dhe rikthimin e përfaqësimit të drejtë të shqiptarëve.
Nga BDI reagojnë ndaj përdorimit të emërtimit “Armata maqedonase”, duke theksuar se emërtimi zyrtar është Armata e Republikës së Maqedonisë së Veriut dhe se institucioni u përket të gjithë qytetarëve të vendit. “Në rendin kushtetues, përcaktimi ‘maqedonas’ lidhet vetëm me identitetin etnik të popullit maqedonas, ndërsa emri zyrtar është Armata e Republikës së Maqedonisë së Veriut. Ajo u përket të gjithë qytetarëve dhe të gjitha bashkësive që e përbëjnë shtetin”, thuhet në reagimin e BDI-së.
Sipas partisë, përdorimi i këtij emërtimi është tregues i një realiteti më të gjerë që, siç pretendojnë, po krijohet në sektorin e mbrojtjes. “Ndoshta Ministria, pa dashje, ka përshkruar realitetin që vetë Qeveria po krijon”, vlerëson BDI. Partia akuzon se shqiptarët janë larguar në mënyrë sistematike nga pozitat e larta dhe qendrat e vendimmarrjes në Ministrinë e Mbrojtjes. “Dhjetë drejtorë në Ministrinë e Mbrojtjes, asnjë shqiptar. Në nivelet ku merren vendimet, prania shqiptare është reduktuar deri në përjashtim të plotë”, thuhet në kumtesë.
BDI thekson se Armata financohet edhe nga taksat e shqiptarëve dhe se pjesëtarë të komunitetit shqiptar kanë shërbyer dhe vazhdojnë të shërbejnë në uniformën e saj. “Shqiptarët kanë shërbyer dhe vazhdojnë të shërbejnë në uniformën e saj. Familjet shqiptare ia kanë besuar këtij institucioni bijtë dhe bijat e tyre. Askush nuk ka të drejtë ta shndërrojë atë në pronë simbolike dhe institucionale të vetëm një bashkësie”, thekson BDI.
Në shënjestër të kritikave është edhe partia shqiptare në pushtet VLEN, për të cilin BDI thotë se po hesht përballë zhvillimeve në sektorin e sigurisë. “VLEN-i hesht. Ministrat dhe zëvendësministrat e tyre ruajnë kolltukët, ndërsa shqiptarët humbin pozitat në polici, në ushtri dhe në gjithë sistemin e sigurisë”, thuhet në kumtesë.
Sipas BDI-së, roli i përfaqësuesve shqiptarë në pushtet është reduktuar në mbrojtjen e vendimeve të VMRO-DPMNE-së dhe në përplasjet politike me opozitën shqiptare. BDI kërkon që Ministria e Mbrojtjes të korrigjojë emërtimin e përdorur, të publikojë strukturën etnike të pozitave drejtuese dhe të sigurojë përfaqësim të drejtë të shqiptarëve në të gjitha nivelet e vendimmarrjes. “Armata e Republikës së Maqedonisë së Veriut është institucion i përbashkët. Çdo përpjekje për ta paraqitur dhe ndërtuar si institucion monoetnik cenon drejtpërdrejt karakterin multietnik të shtetit dhe frymën e Marrëveshjes së Ohrit”, përfundon BDI.
Shqip