Astrit Gashi ka shprehur publikisht mirënjohjen e tij për Sabri Azirin, duke e vlerësuar për përkushtimin njerëzor, gatishmërinë për t’u ndihmuar qytetarëve dhe mbështetjen që, sipas tij, u ofron pacientëve dhe familjarëve të tyre në Qendrën Klinike Universitare “Nënë Tereza” në Shkup.
Në mesazhin e tij falënderues, Gashi e cilëson Azirin si shembull të përkushtimit njerëzor dhe një person te i cili qytetarët mund të gjejnë mbështetje, udhëzim dhe mirëkuptim në momentet më të vështira.
Duke e lidhur mesazhin me simbolikën e muajit tetor, kur shpallen laureatë të çmimeve të rëndësishme ndërkombëtare për shkencën, paqen dhe shërbimin ndaj njerëzimit, Gashi vlerëson se përkushtimi ndaj komunitetit është një nga format më të rëndësishme të humanizmit.
“Në Shkupin e nobelistes së shenjtë Nënë Tereza, qytetin që i dha botës simbolin më të madh të humanizmit, nëse do të ndahej një çmim për përkushtim ndaj qytetarëve, ky çmim sot patjetër do t’i takonte Sabri Azirit”, shkruan Gashi.
Ai ndan edhe përvojat e tij personale, duke theksuar se sa herë që familjarët apo të afërmit e tij kanë pasur nevojë për ndihmë, Aziri ka qenë i gatshëm t’u përgjigjet kërkesave, pa marrë parasysh orën apo rrethanat.
Sipas Gashit, pikërisht kjo gatishmëri e vazhdueshme e ka bërë Azirin një figurë të afërt me qytetarët e Shkupit ndër vite.
Një tjetër cilësi që Gashi veçon është paanshmëria në trajtimin e njerëzve. Ai thekson se, sipas përvojës së tij, Aziri nuk bën dallime mes qytetarëve, por dëgjon shqetësimet e tyre dhe u ofron mbështetje me empati dhe përkushtim.
Në fund të mesazhit, Gashi shkon edhe më tej, duke e cilësuar Sabri Azirin si kandidat të denjë për titullin simbolik “Qytetari i Vitit”, me arsyetimin se mirënjohja e qytetarëve përbën një nga vlerësimet më të larta morale dhe njerëzore.
“Çmimin që të jep qytetari është mirënjohja më e lartë morale dhe njerëzore! FALEMINDERIT SABRI AZIRI”, përfundon mesazhin e tij Astrit Gashi.
Shqip