Të dy koalicionet shqiptare, VLEN-i në pushtet dhe AKI-ja opozitare, do të garojnë me kandidat edhe në Komunën e Butelit, mëson VOXAL.
Edhe pse nuk e kanë publikuar akoma, këto dy koalicione tashmë kanë marrë vendim për të garuar me kandidat në Butel, ndërsa po shqyrtojnë disa emra si prijës të kësaj beteje.
VLEN-i mes dy emrave, AKI me Linkest Lumanin?
Siç mëson VOXAL, Aleanca Kombëtare për Integrim e udhëhequr nga BDI-ja në Butel do të garojë me mjekun Linkest Lumanin, djali i mjekut të njohur Sedat Lumani.
VLEN-i, nga ana tjetër, po vlerëson opsionin më të mirë mes dy emrave, të cilat nuk bëhen të ditura për opinionin.
Një shqiptar në balotazh?
Gjykuar sipas rezultateve nga zgjedhjet parlamentare të vitit 2024, ka gjasa reale që në zgjedhjet lokale të tetorit për herë të parë një shqiptar të jetë në balotazh për kryetar të Butelit.
VLEN-i ishte forca e dytë pas VMRO DPMNE-së në Butel në zgjedhjet parlamentare, me 3.305 vota, 34 vota më shumë se Fronti Evropian si forcë e tretë. LSDM-ja pati një rënie drastike dhe mori vetëm 1.611 vota në këto zgjedhje.
Prandaj, nëse nuk ka ndryshuar drastikisht situata në terren, gjasat janë shumë reale që njëri kandidat shqiptar të jetë pjesë e balotazhit në Butel.
Nga 4 në 7 këshilltarë shqiptarë?
Përveç balotazhit, shqiptarët mund të përfitojnë edhe 3 këshilltarë shtesë në Butel, duke forcuar faktorizimin në këtë komunë. Këtë e thonë numrat e zgjedhjeve parlamentare të vitit të kaluar, ku partitë shqiptare morën 6.576 vota, krahasuar me zgjedhjet lokale të vitit 2017 kur partitë shqiptare morën 3.837 vota, të shpërndarë në 4 tabore.
Nëse përsëriten përafërsisht rezultatet e vitit 2024, gjasat janë të mëdha që shqiptarët të arrijnë deri në 7 këshilltarë komunalë në Butel.
Shqip