Kryetari i Komunës së Zhelinës nga radhët e VLEN-it, Blerim Sejdiu, ka deklaruar se problemi nuk janë anëtarët e BDI-së, por udhëheqësia e kësaj partie, e cila, sipas tij, nuk po e kupton se koha e saj ka kaluar.

Sejdiu tha se dëshiron të jetë shumë i qartë, që deklaratat e tij të mos keqinterpretohen apo të përdoren për qëllime të caktuara. Ai theksoi se personalisht nuk ka urrejtje ndaj asnjë anëtari të BDI-së dhe nuk mendon se të gjithë janë njësoj, as se të gjithë mbajnë përgjegjësi për vendimet dhe veprimet e udhëheqësisë së tyre. Sipas tij, në radhët e kësaj partie ka njerëz të ndershëm, profesionistë dhe me potencial politik, që meritojnë të dëgjohen dhe të kenë hapësirën e tyre.

Kur flet për udhëheqësinë, Sejdiu tha se qëndrimi i tij është krejt tjetër. Sipas tij, një udhëheqësi që për vite të tëra ka pasur mundësi të dëshmojë veten duhet ta kuptojë se përgjegjësia politike ka edhe fundin e saj.

“Nuk mund të kërkosh besim pa fund, ndërkohë që nuk pranon të japësh llogari për rezultatet. Nuk mund të flasësh për gjenerata të reja, ndërkohë që nuk ua lëshon hapësirën. Dhe nuk mund të pretendosh se përfaqëson të ardhmen, kur vazhdon të mbetesh peng i së kaluarës”, u shpreh Sejdiu.

" "

Ai vlerësoi se udhëheqësia aktuale e BDI-së është politikisht e konsumuar dhe e dështuar në përmbushjen e përgjegjësive të saj. Prandaj, sipas tij, ka ardhur koha që ajo të reflektojë seriozisht dhe që të gjithë drejtuesit, pa përjashtim, të marrin përgjegjësinë politike dhe të japin dorëheqje, duke ua lëshuar rrugën gjeneratave të reja.

Sejdiu theksoi se asnjë post nuk është i përjetshëm dhe se asnjë udhëheqësie nuk i takon e drejta ekskluzive për të vendosur se kush është e ardhmja e një subjekti politik. Sipas tij, politika nuk është trashëgimi familjare, as privilegj i përjetshëm, por përgjegjësi ndaj qytetarëve.

Ai shtoi se nuk kërkon që njerëzit të heqin dorë nga bindjet e tyre politike, por që askush të mos detyrohet të mbetet peng i një udhëheqësie vetëm pse ka qenë pjesë e një subjekti politik për shumë vite.

Sejdiu u shpreh se politika shqiptare ka nevojë për energji të reja, ide të reja, njerëz të rinj dhe një kulturë tjetër të përgjegjësisë. Ai tha se dallimet politike nuk duhet të na kthejnë në armiq dhe se respekti për njerëzit duhet të mbetet i përhershëm.

“Respekt për çdo njeri, por asnjë privilegj të përjetshëm për askënd! Në politikë, të dish kur të marrësh përgjegjësi është e rëndësishme, por të dish kur të largohesh është po aq e rëndësishme. Shqiptarët kanë nevojë për politikë që ecën përpara, jo për politikë që mbetet peng i së kaluarës”, përfundoi Sejdiu.

sqShqip