Shkruan: Mr. Sc. Nefail Emini
Presidenti izraelit, Isaac Herzog, ka vendosur t’ia besojë Gadi Eisenkotit mandatin për formimin e qeverisë së re, pasi ky i fundit siguroi mbështetjen e 67 anëtarëve të Knessetit të sapozgjedhur. Ceremonia zyrtare e dorëzimit të mandatit pritet të mbahet të dielën.
Një element i rëndësishëm i kësaj mbështetjeje është përfshirja e bllokut të partive arabe Ra’am dhe Lista e Përbashkët, me 19 mandate, pavarësisht se mes tyre dhe Eisenkotit nuk janë zhvilluar negociata zyrtare. Kjo paraqet një zhvillim domethënës, sidomos duke pasur parasysh deklaratat e mëparshme të liderit opozitar se nuk synonte të formonte qeveri me këto parti.
Megjithatë, objektivi i përbashkët për t’i dhënë fund qeverisjes së Benjamin Netanyahut duket se ka krijuar një bazë të mjaftueshme bashkëpunimi parlamentar.
Pavarësisht këtij rezultati, sfida e vërtetë për Eisenkotin fillon tani: të ndërtojë një koalicion të qëndrueshëm, të sigurojë votëbesimin në Knesset dhe të ruajë sa më shumë nga premtimet e tij elektorale, duke u përballur njëkohësisht me kundërshtimin e kampit të djathtë të udhëhequr nga Netanyahu.
Me këtë vendim, presidenti Herzog praktikisht ka mbyllur mundësinë e një qeverie të unitetit kombëtar që do ta mbante Netanyahun në pushtet, duke i hapur rrugë një përpjekjeje të re për ndryshimin e shumicës politike në Izrael.
Shqip