Serbia po lëviz drejt modelit të viteve ’90, teksa Presidenti Aleksandar Vuçiç fiton kompetenca të reja mbi forcat e armatosura dhe policinë.
Ndryshimet ligjore e kthejnë atë në komandant absolut de facto, në një periudhë me akuza e protesta të brendshme.
Ekspertët paralajmërojnë rikthim të skemave të Millosheviçit dhe rritje të autoritarizmit në rajon.
Në një klimë politike të tensionuar dhe nën akuza të forta ndërkombëtare, Aleksandar Vuçiç po lëviz për të forcuar pushtetin e tij në mënyrë të paprecedentë që nga vitet ’90.
Mediat në Kosovë raportojnë se presidenti serb ka hartuar ndryshime të reja ligjore që i japin kontroll absolut mbi ushtrinë dhe, paralelisht, po ndërhyn edhe në strukturat e policisë.
Qeveria e Beogradit miratoi së fundi ndryshimin e Aktit të Forcave të Armatosura.
Amendamenti përcakton që shefi i Shtabit të Përgjithshëm dhe oficerët e ushtrisë duhet të zbatojnë vendimet e presidentit.
Në ligjin aktual, roli i kreut të shtetit as nuk përmendet, duke shënuar kështu një kthesë të fortë.
Analisti ushtarak Aleksandar Radiç thekson se ky model ishte identik me periudhën e Slobodan Millosheviçit, kur ushtria ishte nën varësi të plotë të tij.
Edhe policia po shkon drejt të njëjtit destinacion.
Lëvizjet e fundit në personelin policor sugjerojnë kontroll vertikal dhe absolut nga Zyra e Presidentit.
Lëvizja vjen në një kohë kur emri i Vuçiçit përmendet në mediat perëndimore lidhur me skandalin e snajperëve në Sarajevë.
Ndërkohë, Serbia përballet me protesta të gjata prej më shumë se një viti, duke rritur dyshimet se presidenti po kërkon të shtrëngojë pushtetin në duart e tij.
Me kontroll mbi ushtrinë dhe policinë, ekspertët paralajmërojnë rrezikun e rritjes së autoritarizmit në Beograd, duke e kthyer Serbinë edhe një herë në faktor destabilizues në rajonin e Ballkanit.
Shqip