Lufta kundër krimit dhe korrupsionit po zhvillohet pa selektivitet – institucionet veprojnë në bazë të provave dhe ligjit, tha ministri i Punëve të Brendshme, Pançe Toshkovski.
Ai gjatë një paraqitjeje në emisionin “Shou i natës me Bogdan Ilievski” në Televizionin Alfa, iu referua disa çështjeve aktuale të sigurisë, me ç’rast theksoi vendosmërinë e institucioneve në luftën kundër krimit dhe korrupsionit, si dhe nevojën e respektimit konsekuent të sundimit të ligjit.
Toshkovski theksoi se Ministria e Punëve të Brendshme vazhdimisht punon në forcimin e kapaciteteve institucionale dhe avancimin e mekanizmave për zbulimin dhe parandalimin e krimit, ndërsa çdo rast procedohet në bazë të provave dhe në bashkërendim me prokuroritë kompetente dhe institucionet e tjera.
“Qëllimi ynë është që institucionet të funksionojnë në mënyrë profesionale, transparente dhe pa dallime. Lufta kundër krimit dhe korrupsionit nuk guxon të varet nga interesat personale apo politike të askujt, por ekskluzivisht nga faktet dhe provat. Ligji duhet të vlejë njësoj për të gjithë”, theksoi Toshkovski.
Ministri potencoi se besimi i qytetarëve në institucione ndërtohet përmes rezultateve konkrete, veprimit konsekuent dhe mesazhit të qartë se askush nuk është mbi ligjin.
“Kur institucionet funksionojnë në mënyrë profesionale dhe me përgjegjësi, qytetarët e njohin atë përkushtim. Detyra jonë është të tregojmë se sistemi funksionon, se çdo rast hetohet në mënyrë të thelluar dhe se askush nuk është i paprekshëm kur bëhet fjalë për shkeljen e ligjit. Vetëm në këtë mënyrë mund të rikthehet besimi në institucione”, theksoi ministri.
Toshkovski shtoi se lufta kundër krimit të organizuar, korrupsionit dhe krimit ekonomik është një nga prioritetet e Ministrisë së Punëve të Brendshme, ndërsa po ndërmerren aktivitete intensive për zbulimin e rrjeteve kriminale dhe procedimin e të gjitha personave të përfshirë.
“Punojmë në mënyrë sistematike, përmes bashkërendimit me prokuroritë, institucionet financiare dhe organet e tjera kompetente. Kjo luftë kërkon këmbëngulje, profesionalizëm dhe bashkëpunim të fortë institucional, sepse bëhet fjalë për raste komplekse që shpesh kanë edhe dimension ndërkombëtar”, theksoi ministri.
Duke iu referuar rastit të sekuestrimit të drogës në Serbi, Toshkovski theksoi se institucionet kompetente po punojnë aktivisht për përcaktimin e të gjitha rrethanave që lidhen me rastin, në bashkëpunim të ngushtë me shërbimet partnere nga rajoni dhe Evropa.
“Krimi transnacional kërkon bashkëpunim të fortë ndërkombëtar. Shkëmbimi i informacioneve dhe bashkërendimi me institucionet partnere nga rajoni dhe Evropa janë thelbësore për shkatërrimin e suksesshëm të rrjeteve kriminale dhe për konstatimin e së vërtetës së plotë për rastet e këtilla. Detyrimi ynë është që të konstatojmë tërë faktografinë dhe të veprojmë në përputhje me ligjin”, deklaroi Toshkovski.
Ministri theksoi se Ministria e Punëve të Brendshme vazhdon të zhvillojë aktivitete për modernizimin e shërbimeve policore, përmirësimin e kapaciteteve operative dhe avancimin e mekanizmave hetimorë, me qëllim trajtimin më efikas të gjitha formave të krimit.
“Krimi modern po ndryshon dhe po bëhet gjithnjë e më i sofistikuar, prandaj institucionet duhet vazhdimisht të avancojnë kapacitetet e tyre, teknologjinë dhe metodologjinë e punës. Vetëm me institucione të forta, profesionale dhe moderne mund t’u kundërvihemi në mënyrë efikase këtyre dukurive”, theksoi Toshkovski.
Ai nënvizoi se Ministria e Punëve të Brendshme mbetet e përkushtuar për krijimin e një shoqërie të sigurt në të cilën sundon ligji, ndërsa institucionet punojnë ekskluzivisht në interes të qytetarëve.
“Detyrimi ynë është të sigurojmë një sistem që funksionon në mënyrë efikase dhe të drejtë. Qytetarët duhet të dinë se institucionet veprojnë, se çdo rast shqyrtohet me kujdes dhe se lufta kundër krimit zhvillohet në mënyrë konsekuente, profesionale dhe pa kompromise. Vetëm me një qasje të këtillë mund të ndërtojmë një shoqëri ku drejtësia është e barabartë për të gjithë”, theksoi ministri Toshkovski.
Shqip