Avokati Tomë Gashi ka komentuar protestën e paralajmëruar të Organizatës së Veteranëve të Luftës së UÇK-së, e cila pritet të mbahet sot në ora 17:00 në sheshin “Skënderbeu” në Prishtinë, në mbështetje të ish-krerëve të UÇK-së që po gjykohen në Hagë.
I ftuar në Tëvë1, Gashi kritikoi ashpër deputetët që në të kaluarën votuan për themelimin e Gjykatës Speciale, duke i konsideruar ata si bashkëpërgjegjës për situatën aktuale të liderëve të UÇK-së. Ai tha se është paradoksale që pikërisht këta deputetë sot po marrin pjesë në protesta kundër një gjykate të cilën vetë e kanë mbështetur.
“Si është e mundur t’u besojmë atyre që sot po protestojnë, kur janë po të njëjtit që kanë votuar për Gjykatën Speciale – 82 deputetë. Duhet përjashtuar Listën Serbe, sepse ata kanë pritur një situatë të tillë për të dëmtuar çdo pjesëtar të UÇK-së,” theksoi Gashi.
Ai shtoi se është koha që deputetët shqiptarë të marrin përgjegjësi morale dhe politike për këtë vendim: “Mjafton të kenë pak fytyrë e të dalin sot para Parlamentit të Kosovës dhe t’u kërkojnë falje qytetarëve të Republikës së Kosovës dhe secilit pjesëtar të UÇK-së që po gjykohen.”
Shqip