“Rikonstruimi i qeverisë”, Sali: Jemi në fazën e kompletimit të raportit për gjithë funksionarët
Zëvendëskryeministri i parë dhe ministri për Çështje Evropiane, Bekim Sali duke folur për rikonstruimin e Qeverisë, ka thënë se analizohen gjitha perfomancat e funksionarëve dhe në VLEN janë në fazën e kompletimit të raportit për gjithë funksionarët e saj.
Në emisionin “360 Gradë” në TVM1, Sali ka thënë se deri tani ka pasur një takim ku është bërë analizë e bashkëpunimit dhe funksionimit të qeverisë.
Nëse ka ndonjë që është lodhur nga funksioni duhet të shkojë
“Konsideroj se kjo do jetë bazë se si koalicioni qeveritar të ecë më tej, është analizuar puna e qeverisë, e ministrave që të mund të realizohet ajo që është premtuar. Nëse ka ndonjë që është lodhur nga funksioni duhet të shkojë, analizohen gjitha perfomancat e funksionarëve dhe në VLEN jemi në fazën e kompletimit të raportit për gjithë drejtorët, ministra, zv/ministra, drejtues të institucioneve tjera dhe në bazë të atij raporti do të sjellim vendim se ku duhet të freskohet ekipi”, ka thënë Sali.
Ai thekson se me rikonstruimin do të plotësohen edhe dy emrat e ministrave Fetai dhe Limani.
“Do të ketë freskim në ekipin e VLEN-it, ndërsa për pjesën tjetër mbetet e hapur, bisedojmë për mundësitë që emrat të ndërrohen apo pozicionet si resorë”, ka thënë zv/kryeministri i parë Sali.
*Bekim Sali: BDI hap temat etnike për të zbehur projektet e VLEN-it që ata 20 vjet nuk kanë arritur ti realizojnë*
Zëvendëskryeministri i Parë dhe ministër për Çështje Evropiane, Bekim Sali, vlerëson se hapja e temave me prapavijë etnike ka për qëllim të minojë funksionalitetin institucional dhe proceset që, sipas tij, po sjellin rezultate konkrete për qytetarët dhe shqiptarët në vend.
Në emisionin “360 Shkallë” në TVM1, Sali deklaroi se Qeveria po realizon projekte me interes shtetëror dhe nacional, një pjesë e të cilave po zbatohen në rajonet perëndimore të vendit, ndërsa VLEN po tregon pjekuri politike në zgjidhjen e çështjeve të rëndësishme.
“Hapja e temave me prapavijë etnike ka për qëllim të shembë funksionalitetin që po përpiqemi ta fitojmë. Të gjitha ato projekte që po i realizojmë si qeveri nga interesi nacional dhe shtetëror, e që rastësisht realizohen në pjesën perëndimore të shtetit, janë projekte që për 20 vite nuk kanë arritur të realizohen”, tha Sali.
Ai theksoi se tema të tilla si protestat, provimi i jurisprudencës apo çështja e gjuhës shqipe po aktivizohen pikërisht në momentet kur, sipas tij, VLEN po dëshmon kapacitet real qeverisës.
“Mendoj se këto tema hapen për të dëmtuar raportet dhe për të minuar angazhimin dhe proceset që janë në favor të shqiptarëve”, deklaroi Sali.
Sipas tij, rezultatet e deritanishme tregojnë se VLEN po arrin të realizojë projekte dhe procese që kanë munguar për vite me radhë, pavarësisht përpjekjeve për të krijuar tensione dhe ndasi politike.
Shqip