Autoritetet në Kosovë kanë konfiskuar dhe sekuestruar pasuri të kryeterroristit Millan Radoiçiqi, ish-nënkryetar i Listës Serbe, i cili mori përgjegjësinë për sulmin ndaj Policisë së Kosovës në Banjskë shtatorin e vitit të kaluar, ku mbeti i vdekur një polic.
Tashmë është publikuar lista e gjatë e pronave që janë konfiskuar, ku përfshihen vila, banesa, dhjetëra vetura, restorant e të tjera.
Ndryshe, gjatë ditës së djeshme, në një aksion në veri, Agjencia për Administrimin e Pasurive të Sekuestruara ose të Konfiskuara konfiskoi dy prona të paluajtshme në Mitrovicën e Veriut dhe një në komunën e Zubin Potokut, të cilat janë të lidhura me sulmin terrorist në Banjskë.
Nga Policia kanë bërë me dije se ka pasur një urdhër të Gjykatës për konfiskimin e tri pronave, vilës së Radoiçiqit, restorantit Grey dhe një banese në katin e gjashtë mbi restorantin Grey.
Këto tri prona të paluajtshme ishin sekuestruar fillimisht nga Prokuroria e Kosovës në shtatorin e vitit të kaluar.
