Ka filluar procesi për shpronësimin e pronave ku pritet të kalon rruga që do të lidh Prizrenin me Tetovën, kështu paralajmëroi Qeveria e Kosovës gjatë prezantimit të projekteve të ndryshme infrastrukturore.
“Sot Qeveria ka marrë vendim për shpronësimin e parcelave që prekin trasenë e projektit të madh të rrugës Prizren-Tetovë. Më lejoni që t`ju njoftoj që qysh sot do të shpallim njoftimin për kontratë për ndërtimin e kësaj rruge”, njoftoi ministri i Infrastrukturës në Kosovë, Liburn Aliu.
Ai ka theksuar që deri më tani kanë arritur të zvogëlojnë borxhet e mëdha të trashëguara.
“Përkundër sfidave dhe telasheve të trashëguara, po angazhohemi maksimalisht që projektet të marrin drejtimin e duhur”, deklaroi Aliu.
Më 6 shtator të këtij viti, drejtori i NPRSH-së, Ejup Rustemi deklaroi se ministritë e të dyja vendeve janë në kontakt të vazhdueshëm, ndërkaq Ministria e RMV-së, e ka dërguar në Kosovë versionin e parë për marrëveshje, për çka do të duhet të kthejnë vërejtje dhe më pas autoritetet e RMV-së t’i shqyrtojnë dhe nga fundi i shtatorit të ketë marrëveshje, e cila planifikon projektimin e tunelit të përbashkët prej 6,4 kilometra.
Pas asaj, siç tha Rustemi, do të vazhdohet me projektimin e rrugës (në RMV) që çon deri në hyrje të tunelit. “Së pari, kemi projektin, kemi revidimin e projektit dhe mbas asaj realizimin e punimeve”, tha Rustemi.
Rruga në fjalë do të duhej të fillonte në vitin 2014-të dhe të mbaronte në vitin 2018-të, por partia shqiptare në pushtet, BDI nuk ka arritur që ta jetësojë këtë projekt me rëndësi të madhe për Kosovën dhe RMV-në.
Rruga Tetovë – Prizren. Ky projekt do të jetë në vlerë prej 40 milion-60 milion euro, mjete që do të sigurohen nga buxheti i shtetit dhe Banka Botërore. Realizimi i këtij projekti do të ketë një ndikim të madh në zhvillimin ekonomik të zonës, shkëmbimin tregtar në mes dy vendeve, qasjen më të shpejtë për dalje në det (porti i Lezhës dhe i Durrësit), zhvillimi i turizmit në Kodrën e Diellit, etj.
