Tanket izraelite janë tërhequr nga rruga Salah al-Din në qytetin e Gazës pas një inkursioni të shkurtër, tha sot qeveria në Rripin e Gazës, transmeton Anadolu.
“Nuk ka tanke izraelite në rrugën Salah al-Din dhe jeta është kthyer në normalitet”, tha Zyra e Qeverisë për Media në një deklaratë.
Dëshmitarët okularë thanë më herët për Anadolu se tanket izraelite u zhvendosën të dielën mbrëma nga qyteti Juhor Ad-Dik në lindje të Rripit të Gazës në rrugën Salah al-Din, në juglindje të qytetit të Gazës.
Inkursioni përkoi me bombardime të rënda artilerie dhe sulme ajrore, thanë ata.
“Okupatori po përpiqet të krijojë një pamje joreale në lidhje me praninë e forcave të tij brenda Gazës, por ato nuk mund të qëndrojnë në territorin nën goditjet e rezistencës”, tha Zyra për Media.
“Nuk ka asnjë inkursion tokësor në lagjet e banuara në Rripin e Gazës”, shtoi ajo.
Zëdhënësi i ushtrisë izraelite Daniel Hagari tha sot se ushtria po “përparonte gradualisht” në Gaza.
“Ne po kryejmë një operacion të zgjeruar tokësor drejt Rripit”, u tha ai gazetarëve.
Ushtria izraelite zgjeroi të premten sulmet ajrore dhe tokësore në Rripin e Gazës, i cili ka qenë nën sulme të pamëshirshme ajrore që nga ofensiva e befasishme e Hamasit më 7 tetor.
Mbi 9.800 njerëz janë vrarë në konflikt, duke përfshirë 8.306 palestinezë dhe më shumë se 1.538 izraelitë.
