Një vajzë e re ka humbur jetën në orët e para të mëngjesit në Spitalin e Tetovës, pas një trajtimi të mëparshëm në spitale private. Rasti ka tronditur komunitetin dhe ngre pyetje të forta për cilësinë dhe sigurinë e terapisë jashtë institucioneve publike.
Sipas mjekëve nga Spitali i Tetovës, e ndjera është pranuar në urgjencë rreth orës 03:00 në gjendje të rëndë. Ajo është transferuar në repartin e Infektives, ku fatkeqësisht ka ndërruar jetë.
Autoritetet shëndetësore po presin rezultatet e obduksionit për të përcaktuar shkakun e saktë të vdekjes. Ndërkohë, dyshimet lidhen me trajtimin që vajza kishte marrë më parë në spitale private, duke ngritur dyshime për fshehje apo keqmenaxhim në këto institucione.
Spitalet private dhe mënyra e trajtimit atje mbeten në fokusin e hetimeve, ndërsa familjarët dhe opinioni publik kërkojnë përgjigje për tragjedinë që tronditi Tetovën.
Shqip