Sipas një sondazhi të “Gallup International”, sot më pak njerëz në botë janë të gatshëm të luftojnë për vendin e tyre në krahasim me një dekadë më parë
Xhenur ISENI
Shkup, 12 mars – Nëse do të kishte një luftë që përfshin vendin tuaj, a do të luftonit për vendin tuaj? 34% e të anketuarve në Maqedoninë e Veriut janë përgjigjur me “po”, 51% janë përgjigjur me “jo”, dhe 15% nuk kanë ditur/nuk kanë dhënë përgjigje. Këtë e tregon hulumtimi i ri i Shoqatës Botërore “Gallup International” i kryer në 45 vende të botës. Gjithsej janë intervistuar 46.138 persona, me telefon, online ose ballë për ballë, në periudhën nga tetori deri në dhjetor 2023. Në Maqedoninë e Veriut janë intervistuar ballë për ballë 1202 qytetarë madhorë, në periudhën 1-21 dhjetor 2023. A devijon Maqedonia e Veriut nga pikëpamjet e saj për këtë çështje në krahasim me vendet e BE-së? Përgjigja është – jo. Nëse shikoni përqindjen në BE sipas rezultateve totale, ata që do të luftonin për vendin janë 32%, ata që nuk do të luftonin është 47%, dhe 21% nuk kanë përgjigje.
