Shoqata “RAST” apelon te prindërit të jenë të kujdesshëm me zhvillimin e fëmijëve. Kryetari i shoqatës, Aleksandar Petrovski, këshilloi që lartësia e fëmijëve të kontrollohet të paktën dy herë në vit dhe rezultatet të pasqyrohen në tabelat e rritjes, që tregojnë nëse zhvillimi është në përputhje me moshën
Shkup, 22 shtator – Në Maqedoni aktualisht janë 174 pacientë që kanë nevojë për hormonin e rritjes dhe të gjithë e marrin terapinë në mënyrë të rregullt. Autoritetet shëndetësore sigurojnë se nuk ka më listë pritjeje për këtë trajtim, ndërsa për këtë qëllim është ndarë një buxhet prej 75 milionë denarësh.
Rritja është një proces i ndërlikuar që tregon gjendjen e përgjithshme shëndetësore të fëmijës dhe lidhet me zhvillimin në lartësi, peshë dhe dimensione të tjera trupore. Rritja nënkupton shtimin e numrit dhe madhësisë së qelizave në organizëm.
Një nga shembujt është 11-vjeçarja Dina Ibishi, e cila së bashku me nënën e saj mori pjesë në shënimin e Ditës Botërore për ndërgjegjësimin mbi rritjen e fëmijëve, organizuar nga Shoqata “RAST” nën moton “Folu me zë të lartë”. Nëna e saj, Azra, kujton se më parë vajza nuk e kishte terapinë, por me përpjekje dhe me ndihmën e shoqatës e siguroi atë. Që nga ajo kohë, terapia është e rregullt. “Pak u vonua terapia, pritëm disa muaj. Me presion dhe me ndihmën e Shoqatës, falë edhe doktoreshës Aleksandra Jançevska, arritëm ta sigurojmë. Tani terapia është e rregullt,” tha Azra Ibishi.
Shoqata “RAST” apelon te prindërit të jenë të kujdesshëm me zhvillimin e fëmijëve. Kryetari i shoqatës, Aleksandar Petrovski, këshilloi që lartësia e fëmijëve të kontrollohet të paktën dy herë në vit dhe rezultatet të pasqyrohen në tabelat e rritjes, që tregojnë nëse zhvillimi është në përputhje me moshën.
Zëvendësministri i Shëndetësisë, Jovica Andovski, theksoi se për herë të parë është siguruar hormon për të gjithë fëmijët që kanë nevojë. “Bëhet fjalë për gjithsej 174 fëmijë, për të cilët hormoni është i siguruar me kohë dhe në Klinikën e Fëmijëve nuk ka listë pritjeje, siç kishte më parë”, tha ai.
Në të njëjtën linjë, drejtori i Fondit të Sigurimit Shëndetësor, Sasho Klekovski, shtoi se qëllimi është që jo vetëm këtë vit, por edhe në vitet e ardhshme të mos ketë pritje për këtë terapi. “Ky është minimumi që mund të bëjmë për këta fëmijë dhe familjet e tyre”, tha ai.
Nga Klinika e Fëmijëve nënvizuan se është e domosdoshme të hapet një nën-specializim i ri për endokrinologji pediatrike dhe gjenezë, që deri tani nuk ka ekzistuar. “Kjo është sfida jonë e re”, theksoi prof. dr. Sonja Bojaxhijeva.
Hormoni i rritjes është thelbësor për zhvillimin normal të fëmijës. Ai prodhohet nga një gjëndër e vogël në tru e quajtur hipofizë dhe ndikon në metabolizmin e kockave, duke i bërë ato më të forta dhe më të shëndetshme. Po ashtu ndikon në funksionimin e organeve, ekuilibrin midis muskujve dhe yndyrës, energjinë dhe gjendjen e përgjithshme shëndetësore.
Mjekët theksojnë se jo çdo fëmijë që është më i shkurtër se bashkëmoshatarët ka problem me rritjen, por nëse ka dyshime, prindërit duhet të konsultohen me mjekun dhe të bëjnë kontrolle të rregullta.
Shqip