Ministria e Shëndetësisë në vitin 2026 do të ketë buxhet më të ulët për pacientët me sëmundje të rralla, respektivisht 7 milionë euro më pak krahasuar me buxhetin e këtij viti. Disa ditë tentuam të marrim një përgjigje nga Ministria e Shëndetësisë se pse është marrë ky vendim por nga atje pa përgjigje.
“Ministria e Shëndetësisë vazhdon të hesht për arsyet pse në buxhetin e vitit 2026 parashikohet shkurtim i mjeteve për pacientët me sëmundje të rralla. Pa shpjegime dhe pa transparencë, mbetet e paqartë nëse këto shkurtime do të prekin terapitë që për shumë pacientë janë çështje jete a vdekjeje. Çdo ditë pa përgjigje e thellon pasigurinë për njerëzit që varen nga këto trajtime jetike”, raporton Linda Ebibi, gazetare.
Aleanca Kombëtare për Sëmundje të Rralla shpreh shqetësimin se shkurtimi i buxhetit do të rrezikojë jetën e pacientëve pasi në mungesë të terapive qoftë edhe për një kohë të shkurtër ndikon në përkeqësimin e gjendjes së tyre.
Gjithashtu nuk do të ketë mjete as për pacientët e rinj që mund të diagnisitifikohen me ndonjë sëmundje të rrallë.
“Shkurtimi i mjeteve për këtë program, do të reflektohet drejtpërdrejtë në numrin e pacientëve që mund të marrin terapi…nëse buxheti mbetet në nivelin e paraparë aktualisht, nuk do të ketë mundësi për trajtimin e pacientëve të rinj dhe për futjen e terapive të reja.
Pasojat nga shkurtimi i mjeteve buxhetore mund të jenë të mëdha në aspektin e kontrollit të sëmundjeve, përkatësisht mund të vijë deri te përkeqësimi i gjendjes klinike të pacientëve, por edhe rrezik serioz për sigurinë e jetës së tyre, pasi këto sëmundje shpesh kanë progresion të shpejtë nëse nuk trajtohen në mënyrë adekuate”, thonë nga Aleanca Kombëtare për Sëmundje të Rralla.
Disa ditë më parë, ministrja e Financave deklaroi se nuk mund të përgjigjet pse është shkurtuar buxheti për pacientët me sëmundje të rralla, duke theksuar se secili ministër vendos vetë për prioritetet dhe mënyrën e shpërndarjes së mjeteve brenda resorit që drejton. /Alsat.mk
Shqip