Kryeministri Hristijan Mickoski priti në takim kryetaren e Komisionit Evropian Ursula Von Der Lejen, e cila zhvilloi vizitë në vendet e Ballkanit Perëndimor. Përmes një njoftimi Qeveria thekson se në takim është diskutuar për perspektivën evropiane, progresin e proceseve reformuese, bashkëpunimin ekonomik, sigurinë energjetike dhe transformimin dixhital. Sipas njoftimit, kryeministri Mickoski ka theksuar vendosmërinë e Qeverisë për përshpejtimin e integrimit evropian të vendit, përmes rezultateve konkrete dhe përmbushjes së standardeve evropiane. Mickoski në takim ka theksuar se vendi pret nga Bashkimi Evropian përkushtim të qartë dhe konkret, si konfirmim i perspektivës evropiane dhe mbështetje për qytetarët, të cilët me dekada mbeten të përkushtuar ndaj vlerave evropiane. Në axhendën e kryetares së Komisionit Evropian ishte edhe takimi me presidenten Gordana Siljanovska Davkova dhe kreun e Kuvendit Afrim Gashi. /Alsat.mk
Shqip