Urim HASIPI
Tetovë, 11 prill – Pas ankesave të komunës së Tetovës se policia e Tetovës në vazhdimësi dërgon në kontroll teknik automjetet e ndërmarrjes për higjienë “Saubermaher”, nga Sektori për Punë të Brendshme në Tetovë janë përgjigjur se bëhet fjalë për kontrolle në lidhje me lëshimet dhe parregullsitë në komunikacion ndaj të gjithë kundërvajtësve të cilët sipas planit të Ministrisë së Punëve të Brendshme zbatohen në të gjithë shtetin dhe në asnjë rast kjo nuk është bërë veçmas për ndonjë person juridik apo kompani. “Gjatë muajit të kaluar gjatë aksioneve të tilla, të cilat janë kryer në komunikacionin në rrugët e Tetovës, janë konstatuar rreth njëzet kundërvajtje si automjete me defekte teknike, me defekte të ndryshme si: defekte në pajisjet e frenimit, pajisjet drejtuese, pajisje për ndriçim rrugor, gjendjen e xhamave, drejtimi i një automjeti me kategori të papërshtatshme në patentë shofer, pa patentë shoferi, ose automjete të paregjistruara nga kompanitë publike si transport publik i udhëtarëve, ndërmarrje për pastërti publike dhe ndërmarrje të tjera që gravitojnë në zonën e SPB Tetovë”, thotë Fatmir Rexhepi, zëdhënës i SPB-Tetovë.
Nga komuna e Tetovës janë ankuar për presione nga Policia e Tetovës, ndaj ndërmarrjes për higjienë “Saubermacher”. Kreu i këshillit të komunës së Tetovës Besar Durmishi, tha se ky presion që sipas tij është me prapavijë politike, po bëhet gjatë festës së Bajramit, me qëllim që ndërmarrja në fjalë të mos mund të grumbulloj mbeturinat si duhet.
“Edhe më herrët policia na ka sabotuar në mënyra të ndryshme duke refuzuar çdo kërkesë të komunës. Paramendojeni, vetëm brenda 20 ditësh kamionët e kësaj ndërmarrjeje janë dërguar tre herë në kontroll teknik, kurse aspak nuk është marrë me dërgimin në kontroll të automjeteve të ndërmarrjeve dhe institucioneve të tjera shtetërore, që dëshmon se, aksioni po ndodh për arsye politike dhe për të dëmtuar Tetovën”, tha Besar Durmishi, kryetar i këshillit komunal.
Krahas kësaj, policia sërish ka kryer aksion kontrollues ndaj automjeteve dhe drejtuesve të ndërmarrjeve publike dhe subjekteve juridike që kryejnë shërbime publike. “Gjatë kontrollit janë zbuluar dhe sanksionuar 16 kundërvajtje prej të cilëve në Tetovë tre, dhe 13 në Gostivar, nga të cilat 3 me parregullsi teknike, në pajisjet e frenimit, 3 automjete me targa të Gostivarit me regjistrim të skaduar. Automjetet me defekte teknike janë përjashtuar nga qarkullimi, ndërsa ndaj drejtuesve të mjeteve, përkatësisht personave juridikë dhe përgjegjës janë paraqitur parashtresat përkatëse ligjore”, thonë nga policia e Tetovës. Policia përsërit apelin për drejtuesit dhe pronarët e automjeteve nga ndërmarrjet publike dhe subjektet juridike që kryejnë shërbime publike, që me kohë të kontrollojnë korrektësinë teknike të automjeteve, gjë që do të kontribuojë në sigurinë personale dhe sigurinë e udhëtarëve që i transportojnë në transportin publik, si dhe të përdoruesve të tjerë të rrugës. (koha.mk)
