Shkruan: Adnan Azizi
24 vite nga masakra e Lubetenit, 24 vite tradhti për lubetenasit e shpërblim për dorasit!
Sot unë bënë 24 vite që kur me urdhër të Lube Boshkovskit, në 12 gusht të vitit 2001, në Lubeten të Shkupit u vranë 10 banorë të pafajshëm mes të cilëve edhe një gjashtë vjeçar, u keqtrajtuan mbi 100 banorë të tjerë, u dogjën 14 shtëpi. Pse? Sepse akuzoheshin se kanë strehuar UÇK-në!
Për këtë makabër Gjykata e Hagës, e dënoi me 12 vite burg pjesëtarin e “Branitellave”, Johan Tarçullovski, ndërsa e liroi Lube Boshkovskin.
Por, si veproi BDI dhe “patriotët” me banorët e Lubetenit, ish-ushtarët e UÇK-së, veteranët dhe familjet e dëshmorëve, e si me “Branitellat” e dënuar për krime lufte?!
Derisa ish-ushtarët e UÇK-së, familjet e dëshmorëve dhe veteranët po injoroheshin totalisht, sa që edhe u ndalohej qasja në institucione dhe benefite, Aliu dhe BDI, përmes ministrave dhe deputetëve të tyre sollën ligjin e “Branitellave”, me të cilin atyre dhe familjarëve të tyre u jepet të gëzojnë shumë benefite nga shteti, si pensione, shëndetësi pa pagesë, arsim falas për fëmijët e tyre në universitetet shtetërore e shumë të tjera!
Por nuk mungoi edhe shpërblimi me të holla. Qeveria e BDI shpërbleu Lube Boshkovskin dhe Johan Tarçullovskin, me së paku nga 5 000 euro.
Por nuk ishte vetëm kjo!
Ja me fakte po ia rikujtoj edhe njëherë Ali Ahmetit dhe BDI-së se më 25 maj të vitit 2022, me nënshkrim të zv/kryeministrit Artan Grubi, Qeveria e tij ka vendosur të shpërblejë “Branitellat” me qindra mijëra denarë, pa asnjë arsye të cekur?!
A janë burra këta të BDI-së të nxjerrin një dokument, ose një fakt, ku nga Qeveritë e tyre është shpërblyer ose ka përfituar ndonjë benefit, dikush nga ish-ushtarë UÇK-së, veteranët ose familjarët e të rënëve?! Jo, sepse një gjë e tillë nuk ekziston!
BDI dhe funksionarët e saj mund të dëshmojnë vetëm një gjë! Se UÇK-në e tradhtuan ndërsa ushtarët, dëshmorët dhe familjarët e tyre i nënçmuan dhe i harruan!
Por nuk harruan që përmes gjakut të dëshmorëve, për vete të bëhen milionera!
Shqip