Lloga: Jemi të gatshëm të nisim përfundimin e mandatit të anëtarëve të Këshillit Gjyqësor për t’i hapur rrugën reformave

Ministri i drejtësisë Krenar Lloga sot mori pjesë në ngjarjen e organizuar nga Fondacioni për Shoqëri të Hapur Maqedoni dhe grupi BLUEPRINT për reformë në gjyqësor, ku u diskutua se çfarë mund të bëhet për të rikthyer besimin e qytetarëve në Këshillin Gjyqësor.

Gjatë fjalës së tij ai theksoi se, është e nevojshme për reformë serioze të Këshillit Gjyqësor dhe forcimin e rolit të Shoqatës së Gjyqtarëve.

“Jemi në pritje të Raportit nga Misioni vlerësues, për të cilin menjëherë pasi ta marrim do të formojmë një Grup pune i cili do të inkorporojë rekomandimet nga raporti dhe do të zbatojë aktivitetet nga Strategjia e re zhvillimore për sistemin e gjyqësorit (2023 – 2027), lidhur me ri përcaktimin e procedurës për zgjedhjen dhe shkarkimin e anëtarëve të Këshillit Gjyqësor”, theksoi ministri Lloga.

Ai shtoi se Ministria e Drejtësisë është e gatshme të nisë përfundimin e mandatit të anëtarëve, me qëllim të reformimit të përbërjes së Këshillit, për të cilën pret edhe mbështetjen e deputetëve në Kuvend, e gjithashtu për të njëjtën do të ketë debat të hapur dhe të gjerë.