Dje Ali Ahmeti, në fjalimin e tij në tubimin për UÇK-në, paska thënë se Kosovën e paska përjetuar gati si në kohën e demonstratave kundër Serbisë. U desh ta dëgjoj disa herë këtë që t’u besoj veshëve.
Përtej kategorisë së turpit, për të cilën nuk mund ta fajësoj dikë për të cilën nuk kam konsiderata etike, ajo që më duhet ta them është se ne të gjithë mund të kemi shpjegime të ndryshme për politikën kosovare, mund ta vlerësojmë një politikan më shumë e një tjetër më pak, por ta barazosh Kosovën e lirë dhe të pavarur me Kosovën e okupuar nga Serbia, kjo është më synim për të nxirë gjithçka atje vetëm sepse nuk je aleat me drejtuesit e shtetit të sotëm të Kosovës.
Prandaj më duhet t’ia kujtoj z. Ahmeti se nëse dikush ka pasur tendencë për ta rikthyer Serbinë në Kosovë është pikërisht ai me Ballkanin e Hapur të pobratimave të tij. Në një tubim të Ballkanit të Hapur, të mbajtur në Ohër, atëbotë Edi Rama deklaroi se ideja e Ballkanit të Hapur është e Ali Ahmetit dhe vetë z. Ahmeti nuk e ka mohuar kurrë këtë deklarim të z. Rama.
E kur kësaj i shtohen edhe disa elemente, si pritja e Vuçiqit me temena në Shën Naum, keqardhja e Vuçiqit për humbjen e BDI-së në zgjedhjet e vitit të kaluar ose edhe deklarimi me gjysmë zë ndaj sulmit terrorist serb në Banjskë si të jetë një sulm në Burundi e jo ndaj Republikës së Kosovës, nuk mund të mos dyshosh se ai i cili deshi ta kthejë Serbinë në Kosovë ishte pikërisht autori i Ballkanit të Hapur serb.
Për fat të mirë, ajo ide perëndoi, siç po perëndon edhe z. Ahmeti me këto politika ataviste.
Edhe diçka: a ka shpjeguar dje në Prishtinë Ali Ahmeti se çfarë ka deklaruar para hetuesve të Gjykatës Speciale në hetimet dyditore përkitazi me të arrestuarit e UÇK-së në Hagë?
Hemingueji do të thoshte “Dhe, mos pyet se për kë bie kambana. Ajo po bie për ty.”.
Shqip