Gazeta më e njohur britanike: Vuçiqi ka qenë ministër i Millosheviqit, SHBA dhe BE po tregohen tepër tolerantë ndaj tij

Gazeta e njohur britanike “The Times” ka shkruar mbi rolin destruktriv të presidentit të Serbisë, Aleksandër Vuçiq, qasjen e butë të kancelarive perëndimore ndaj regjimit në Beograd, veçanërisht pas tensioneve në pjesën veriore të Kosovës të banuar me shumicë serbe dhe aleancën e tij me presidentin rus Vladimir Putin.

Në artikull thuhet se bashkësia e organizuar ndërkombëtare – Shtetet e Bashkuara të Amerikës dhe Bashkimi Evropian – po tregohet tepër tolerante me presidentin serb, gjithmonë me shpresën se vetëm kështu mund t’i prishin marrëdhënien e mira ndërmjet Serbisë dhe Rusisë.

“Vuçiqi kështu ka marrë guxmin për të ngritur retorikën nxitëse dhe të godasë kritikët vendas duke vepruar njëkohësisht si një kanal për përhapjen e ndikimit rus. Ai nuk është mik i Perëndimit dhe politikat e tij janë një kërcënim i fuqishëm për stabilitetin në rajon”, shkruan e përditshmja britanike.

Gazeta prestigjioze vjen në përfundimin se Perëndimi duhet të braktisë ‘mitin’ se presidenti serb luan rol qendror për sigurinë e Ballkanit Perëndimor, ngase ai nuk është fare konstruktiv, përkundrazi. Madje, gazeta kujton se Vuçiqi ka qenë ministër i propagandës në kohën e Sllobodan Millosheviçit – kriminelit të paditur për krime lufte.

“Pavarësia e Kosovës me të drejtë është mbështetur nga vendet perëndimore, përfshirë Britaninë e Madhe dhe SHBA-të, që në krye të herës. Rusia është përpjekur të pengojë atë dhe Vuçiqi ka qenë në mënyrë transparente i plotfuqishmi i Putinit, ndërsa pretendon të jetë i hapur ndaj Perëndimit”.

Një pjesë e artikullit i kushtohet edhe ngjarjeve të fundit në pjesën veriore të Kosovës të banuar me serbë etnikë. Aty thuhet se nxitësi kryesor i protestuesve serbë që sulmuan paqeruajtësit e NATO-s (KFOR) ishte pikërisht presidenti serb, ndonëse e kishte të lehtë të parandalonte dhunën.