Kryeministrja e Danimarkës i ka thënë Donald Trumpit të “ndalojë kërcënimet” për marrjen e Groenlandës.
Mette Frederiksen tha se “nuk ka absolutisht asnjë kuptim të flasësh për nevojën që Shtetet e Bashkuara të marrin Groenlandën”, duke shtuar: “SHBA-të nuk kanë të drejtë të aneksojnë asnjë nga tre kombet në mbretërinë daneze”.
Vërejtjet e saj vijnë pasi Katie Miller, gruaja e njërit prej ndihmësve të Trumpit, Stephen Miller postoi në Twitter një hartë të Groenlandës me ngjyrat e flamurit amerikan së bashku me fjalën “SË SHPEJTI”.
Trump ka ngritur vazhdimisht mundësinë që Groenlanda të bëhet një pjesë e aneksuar e SHBA-së, duke përmendur vendndodhjen e saj strategjike dhe pasurinë minerale, dhe i dyfishoi pretendimet e tij pas komenteve të Frederiksen.
Në deklaratën e saj, të postuar në faqen e internetit të qeverisë daneze, Frederiksen tha se po i drejtohej SHBA-ve “shumë drejtpërdrejt”.
Ajo tha se Danimarka “dhe kështu Grenlanda” ishte anëtare e NATO-s dhe e mbuluar nga garancia e sigurisë së Aleancës. Ajo tha se Danimarka tashmë kishte një marrëveshje mbrojtjeje me SHBA-të që i jepte asaj akses në Groenlandë, dhe se Danimarka kishte rritur investimet e saj në sigurinë në rajonin e Arktikut.
“Prandaj, do t’i nxisja fuqimisht Shtetet e Bashkuara të ndalojnë kërcënimet kundër një aleati historikisht të ngushtë dhe kundër një vendi tjetër dhe një populli tjetër që e kanë thënë shumë qartë se nuk janë në shitje”, tha ajo.
Orë më vonë në Air Force One, Trump përsëriti qëllimin. “Ne kemi nevojë për Groenlandën nga pikëpamja e sigurisë kombëtare, dhe Danimarka nuk do të jetë në gjendje ta bëjë këtë”, tha ai.
Më parë, ambasadori danez në SHBA iu përgjigj postimit të znj. Miller, një podkaster e krahut të djathtë dhe ish-ndihmëse e Trump gjatë mandatit të tij të parë – me një “kujtesë miqësore” se të dy vendet ishin aleate dhe duke thënë se Danimarka priste respekt për integritetin e saj territorial.
Shkëmbimi i deklaratave vjen pasi SHBA-të kryen një operacion të madh ushtarak kundër Venezuelës të shtunën, duke kapur presidentin e saj Nicolas Maduro dhe gruan e tij dhe duke i zhvendosur ata në Nju Jork.
Trump më vonë tha se SHBA-të do të “drejtonin” Venezuelën dhe kompanitë amerikane të naftës do të “fillonin të fitonin para për vendin”.
Presidenti amerikan më parë ka refuzuar të përjashtojë përdorimin e forcës për të siguruar kontrollin e Groenlandës, një ishull i madh në Arktik.
Trump ka pohuar se bërja e saj pjesë e Shteteve të Bashkuara do t’u shërbente interesave të sigurisë së SHBA-së për shkak të vendndodhjes së saj strategjike dhe bollëkut të mineraleve kritike për sektorët e teknologjisë së lartë.
Lëvizja e fundit e administratës Trump për të emëruar një të dërguar special në Groenlandë shkaktoi zemërim në Danimarkë.
Groenlanda, e cila ka një popullsi prej 57,000 banorësh, ka pasur vetëqeverisje të gjerë që nga viti 1979, megjithëse mbrojtja dhe politika e jashtme mbeten në duart e danezëve.
Ndërsa shumica e banorëve të Groenlandës mbështesin pavarësinë përfundimtare nga Danimarka, sondazhet e opinionit tregojnë kundërshtim dërrmues ndaj bërjes pjesë e SHBA-ve.
Shqip