Presidenti turk Recep Tayyip Erdoğan tha sot se Ankaraja do të vazhdojë të bëjë çdo përpjekje për të ndihmuar në gjetjen e zgjidhjes paqësore të konflikteve rajonale, duke përfshirë konfliktin Izrael-Palestinë, transmeton Anadolu.
Erdoğan ka zhvilluar bisedë telefonike me presidentin ukrainas Volodymyr Zelenskyy.
“Gjatë bisedës u trajtua lufta Rusi-Ukrainë, si dhe konfliktet midis Izraelit dhe Palestinës dhe kriza humanitare në rajon”, tha Drejtoria e Komunikimeve e Türkiyes në platformën sociale “X”.
“Duke deklaruar se është e mundur të zgjidhen me mjete paqësore konfliktet rajonale, veçanërisht mosmarrëveshja Izrael-Palestinë, presidenti Erdoğan vuri në dukje se Türkiye do të vazhdojë të bëjë çdo përpjekje për këtë qëllim”, njoftohet më tej.
Konflikti në Gaza, nën bombardimet dhe bllokadën izraelite që nga 7 tetori, filloi kur Hamasi nisi operacionin “Tufani i Aksasë” – një sulm i befasishëm i shumanshëm me lëshime raketash dhe infiltrimesh në Izrael nga toka, deti dhe ajri.
Hamasi tha se inkursioni ishte në hakmarrje për sulmet ndaj Xhamisë Al-Aksa dhe dhunës në rritje nga kolonët izraelitë.
Ushtria izraelite më pas nisi operacionin “Shpatat e Hekurta” në Rripin e Gazës, duke i vënë 2,3 milionë banorët e territorit nën një rrethim total dhe një bllokadë nga ushqimi, karburanti dhe furnizimet mjekësore.
Numri i të vrarëve në Rripin e Gazës për shkak të sulmeve të vazhdueshme izraelite është rritur në 4.385, përfshirë 1.756 fëmijë të shtunën, ndërsa shifra qëndron në më shumë se 1.400 njerëz në Izrael.
