Anëtarët e ekuipazhit të anijes më të madhe lundruese në botë kanë shpëtuar 14 persona që kishin mbetur të bllokuar në një varkë të vogël në det për tetë ditë.
Bëhet e ditur se shpëtimi ka ndodhur ndërsa “ikona e deteve” u nis nga Miami për në Honduras.
Ekuipazhi nisi një anije të vogël për të transportuar grupin e bllokuar i cili po valëviste një flamur të madh të bardhë në shenjë thirrjeje për ndihmë, shkruan skynews, përcjell Telegrafi.
Royal Caribbean me seli në Miami, në një deklaratë tha se anija u ndesh me “grupin në nevojë për ndihmë”.
“Ekuipazhi i anijes nisi menjëherë operacionin e shpëtimit duke sjellë në mënyrë të sigurt 14 persona në bord”, shtoi operatori i lundrimit, duke theksuar se ekuipazhi është përkujdesur për 14 të shpëtuarit duke u dhënë edhe ndihmë mjekësore.
Një nga pasagjeret e anijes gjatë kohës kur u realizua operacioni i shpëtimit ishte edhe Alessandra Amodio me familjen e saj.
“Ne ishim vërtet të befasuar dhe sinqerisht pak të trembur. Ne kemi qenë në disa lundrime por kurrë nuk kemi parë të ndodhë diçka e tillë. Ishte çmenduri të mendosh se këta njerëz kishin ngecur në det për kaq gjatë”, tha Amodio.
Ndryshe, anija e madhe lundruese me 2,350 anëtarë të ekuipazhit ka kapacitet për 5,610 të ftuar. Ajo krenohet me 20 kuverta, 2,800 kabina për mysafirë, dhe shtatë pishina.
Kjo anije me gjatësi e mposht edhe Titanikun i cili ishte 269 metra i gjatë.
