Kandidati për kryetar të Komunës së Çairit, Bujar Osmani, përmes një videoje të publikuar herët në mëngjes, ka paralajmëruar një qasje të re të punës në komunë, e cila bazohet në disiplinë dhe përkushtim të përditshëm ndaj qytetarëve.
“Nga ora 5:30 deri në orën 7:30 të mëngjesit, çdo ditë do të jem në terren, duke ecur nëpër rrugët e Çairit, për t’i parë personalisht problemet që i shohin qytetarët. Nuk dua raporte nga zyra, dua të shoh vetë çdo gjë që ju e shihni,” tha Osmani.
Ai shtoi se çdo problem do të shënohet dhe në orën 7:30 do të thirren të gjitha shërbimet komunale për t’u dhënë listën e detyrave ditore:
“Kjo është lista e sotme. Rregullojeni.”
Osmani potencoi se ky angazhim nuk është vetëm një premtim elektoral, por një disiplinë e përditshme:
“Çairi meriton një kryetar që nuk fle ndërsa komuna vuan. Unë do ta nis çdo ditë kështu, që dita juaj të nisë më mirë.”
Me këtë qasje, Bujar Osmani paralajmëroi një model të ri të qeverisjes lokale, të bazuar në përkushtim të plotë, transparencë dhe reagim të menjëhershëm ndaj nevojave të qytetarëve të Çairit.
Shqip