Banori i Strumicës ka fituar 2 milionë euro me speca e domate

Kush thotë se nuk fitohet nga kultivimi i prodhimeve bujqësore. Këtë e ka dëshmuar një prodhues nga Strumica, i cili përmes serave ka arritur që të fitojë miliona euro.

Bëhet fjalë për “Serat Hamzali” një ndërmarrje private bujqësore për kultivimin e prodhimeve bujqësore.

Pronari i saj Vase Mitev ka theksuar për portalin Faktor se për nëntë muajt e parë kjo kompani e specializuar në prodhimin e produkteve të kopshtarisë së hershme në serra ka realizuar një fitim prej 2 milionë eurosh. “Është një rezultat 29 për qind më i mirë krahasuar me të njëjtën periudhë të vitit të kaluar dhe është një lajm shumë i këndshëm në këto kushte të vështira dhe të pasigurta ekonomike”, ka thënë Mitev.

Sipas tij, për nëntë muajt e parë, kjo kompani ka prodhuar dhe ka shitur ushqime në vlerë prej 5.8 milionë euro, që është 9 për qind më shumë se një vit më parë. Nga kjo, në tregun vendas kanë përfunduar domatet, kastravecat, specat dhe produkte të tjera të hershme të kopshtit me vlerë 4.7 milionë euro ose 15 për qind më shumë se e njëjta periudhë e vitit të kaluar.

Kompania arkëtoi 1.1 milionë euro nga eksportet, ose 11 për qind më pak se vitin e kaluar. Nga ana e shpenzimeve vihet re një rritje prej 14 për qind. Ato arritën në 3.5 milionë euro. Vërtetë për t’u theksuar është kostoja apo harxhimet për punonjësit, që shkuan në 1.55 milionë euro. Por jo sepse ka edhe shumë punëtorë, por sepse kompania ka paguar dy herë më shumë për punonjësit e saj në nëntë muajt e parë në krahasim me të njëjtën periudhë të vitit të kaluar. (INA)