Në Çellopek të Epërm është hapur shtabi i VLEN-it në Bërvenicë, duke shënuar nisjen zyrtare të aktiviteteve të koalicionit në këtë komunë për zgjedhjet lokale.
Deputeti i VLEN-it, Adnan Azizi, ka deklaruar se kandidati i koalicionit për kryetar të Bërvenicës është Jakup Huseini, të cilin e ka cilësuar si kandidat të përgatitur, të drejtë dhe pa bagazh politik.
“VLEN garon me Jakup Huseinin, një kandidat të përgatitur, të drejtë dhe pa bagazhe politike, që e njeh nga afër komunën dhe problemet e qytetarëve”, ka shkruar Azizi.
Sipas tij, rezultatet e zgjedhjeve të fundit kanë dhënë një mesazh të qartë nga qytetarët e Bërvenicës, ndërsa tani, siç shprehet Azizi, synohet bashkimi i këtij vullneti për të siguruar fitoren në zgjedhjet lokale.
“Bërvenica e dha mesazhin e saj në zgjedhjet e fundit. Sot na takon ta bashkojmë atë vullnet dhe ta çojmë deri në fund fitoren që na u mohua”, thekson Azizi.
Ai ka shtuar se me Jakup Huseinin në krye, Bërvenica synon t’u bashkohet komunave të Pollogut që, sipas tij, po shënojnë përparim.
Në hapjen e shtabit, Azizi ka përmendur edhe çështjen e ish-krerëve të UÇK-së, duke përsëritur qëndrimin e VLEN-it kundër asaj që e cilëson si “gjykim të padrejtë”.
“Shfrytëzuam rastin ta përsërisim qëndrimin e VLEN-it kundër gjykimit të padrejtë të ish-krerëve të UÇK-së. Shpresojmë që Apeli ta përmirësojë këtë padrejtësi”, ka deklaruar Azizi.
Shqip