Një arushë është vërejtur duke u ngjitur në tarracën e një shtëpie në fshatin Otunjë të Tetovës, ku ushqimi ishte lënë në tavolinë. Sipas Tetovo Info, nikoqirët ishin brenda shtëpisë, ndërsa dera e tarracës ishte e mbyllur, kështu që ata arritën ta filmonin dhe fotografonin ariun, transmeton Portalb.mk.
Videoja e publikuar tregon ariun duke u ngjitur në tavolinë dhe duke ngrënë nga një pjatë me ushqim. Pak më vonë, pasi i vuri re personat, ikën me vrap.
Sipas medias, këtë verë në fshatra të tjerë të Tetovës, si Setole dhe Jedoarce, shembuj të ngjashëm të vizitave nga arinjtë u regjistruan në kamerat e mbikëqyrjes, të cilët, në kërkim të ushqimit, lëvizin nëpër fshat, shkatërrojnë koshere bletësh, etj.
Ky nuk është shembulli i parë i pranisë së arinjve në fshatrat në zonën e Malit Sharr. Vitin e kaluar, u raportuan disa sulme nga arinjtë dhe ata shpesh mund të shiheshin përgjatë rrugëve.
Rasti i fundit ishte në korrik të këtij viti kur një grua 41-vjeçare nga fshati Siniçan i Tetovës u sulmua nga një ari ndërsa ecte përgjatë një rruge pyjore në zonën e fshatit.
Më herët në shkurt të këtij viti, një adoleshent rreth 15 vjeç u ndoq nga një ari për dy orë në zonën e fshatit Krapa në komunën e Makedonski Brodit. Fëmija nuk u sulmua ose u lëndua drejtpërdrejt nga ariu dhe arriti të shpëtonte, por ra duke ikur, kur po kthehej në vathë, pra në shtëpi në fshat, së bashku me kopenë e deleve.
Shqip