Është anuluar procedura për tenderimin për projektin Sheshi “Skënderbeu” faza e tretë, njofton TV21. Tenderi, i cili ishte shpallur më 17 tetor, u anulua më 3 nëntor, një ditë para se të skadojë afati.
Për këtë është sqaruar zëvendësministra e Transportit dhe Lidhjeve, Kaltrina Zekolli Shaqiri, e cila ka bërë të ditur edhe shkaqet e anulimit.
“Bëhet fjalë ekskluzivisht për arsye teknike të vërejtura në dokumentacionin e tenderit. Gjatë verifikimit zyrtar u konstatuan mospërputhje dhe gabime të trashëguara në përllogaritje, të cilat kërkojnë korrigjim para vazhdimit të procedurës, me qëllim sigurimin e transparencës dhe respektimit të plotë të ligjit”, tha ajo.
Ka sqarzar poashtu se nuk anulohet i gjithë projekti, por vetëm procedura e prokurimit.
“Për këtë arsye, është marrë vendimi për anulim teknik të procedurës, që nënkupton përmirësimin e dokumentacionit dhe rihapjen e tenderit. Theksojmë se projekti nuk anulohet. Procedura e prokurimit do të hapet sërish në ditët në vijim, ndërsa përmirësimi teknik ka për qëllim vetëm garantimin profesional dhe të qëndrueshëm”, tha Zekolli Shaqiri më tej.
Shqip