Ne i kemi ndërmarrë të gjitha hapat si nga aspekti i trajnimeve ashtu edhe nga aspekti i metodologjisë për licencimin dhe rilicencimin e stomatologëve, tha sot ministri i shëndetësisë Azir Aliu, duke i siguruar stomatologët të qëndrojnë të qetë.
“Atë që e bëmë ne, vlerësoj se është e drejtë dhe në kohë, sepse nëse nuk do të ishte ky hap, ne në shtator, tetor, do të kishim pasur rreth 50 për qind stomatologë pa licencë në Maqedoni, u përgjigj ministri në pyetjen gazetareske gjatë promovimit të Klinikës së renovuar për Urologji në Shkup.
Aliu informoi se prej sot të gjitha aplikimet mund të dorëzohen në Ministrinë e Shëndetësisë.
“Pra Sektori për Stomatologji, tashmë kam nënshkruar vendim, përveç obligimeve ditore që i ka, do të kenë obligim së bashku me të punësuarit në Odë t’i procesojnë të gjitha kërkesat e stomatologëve. Ashtu që, nuk do të ketë ngecje, vetëm do të ketë rend dhe ligj”, tha ministri.
Ai theksoi se do të kujdesen që stomatologët të kenë licenca që janë valide, ndërsa nga ana tjetër, të jenë të sigurt se pacientët do të marrin shërbime që janë me cilësi.
Ministri Aliu të shtunën informoi se Ministria e Shëndetësisë i ndërmerr kompetencat për licencimin e Odës Stomatologjike.
Shqip