OKB miraton rezolutë për “armëpushim të menjëhershëm humanitar” në Gaza

Asambleja e Përgjithshme e OKB-së miratoi një rezolutë që bën thirrje për një “armëpushim humanitar të menjëhershëm dhe të qëndrueshëm” në Gaza, raporton Anadolu.

Rezoluta, e cila u prezantua nga afro 50 vende, duke përfshirë Türkiyen, Palestinën, Egjiptin, Jordaninë, Arabinë Saudite dhe Emiratet e Bashkuara Arabe (EBA), u miratua me një votim 120-14, me 45 vende që abstenuan.

Rezoluta e miratuar në takimin e 10-të të Sesionit Special Emergjent mbi situatën në Territorin e Pushtuar Palestinez shpreh “shqetësim të madh” për “përshkallëzimin e fundit të dhunës” që nga sulmi i Hamasit në Izrael më 7 tetor.

Rezoluta dënon “të gjitha aktet e dhunës kundër civilëve palestinezë dhe izraelitë, duke përfshirë të gjitha aktet e terrorit dhe sulmet pa dallim, si dhe të gjitha aktet e provokimit, nxitjes dhe shkatërrimit”.

Rezoluta gjithashtu kërkoi që “të gjitha palët të përmbushin menjëherë dhe plotësisht detyrimet e tyre sipas ligjit ndërkombëtar”.

Duke theksuar nevojën për të mbrojtur civilët “në përputhje me të drejtën ndërkombëtare humanitare dhe ligjin ndërkombëtar të të drejtave të njeriut”, rezoluta bëri thirrje për “lirimin e menjëhershëm dhe të pakushtëzuar të të gjithë civilëve që mbahen në robëri ilegalisht”.

Rezoluta theksoi rëndësinë e “parandalimit të destabilizimit të mëtejshëm dhe përshkallëzimit të dhunës në rajon”.

Miratimi i rezolutës vjen pasi refuzimit të një amendamenti kanadez nga ana e Asamblesë, të mbështetur nga SHBA, i cili denoncoi “sulmet terroriste” të 7 tetorit nga Hamasi.

Rezoluta vjen gjithashtu pasi ndaj katër projekt-rezolutave të ndryshme u vendos veto në Këshillin e Sigurimit të OKB-së në 10 ditët e fundit.