LIVE: Tensione në veri, të shtëna armësh, digjen disa vetura të policisë së Kosovës

Policia e Kosovës është përpjekur ta ruajë rendin e qetësinë para ndërtesës së Komunës së Zveçanit ku janë mbledhur qytetarë serbë.

Nga pamjet që janë transmetuar live nga qytetarët shihet se është hedhur gaz lotsjellës si dhe dëgjohen krisma armësh.

Policia ka njoftuar se ka qenë duke i asistuar kryetarët e rinj të komunave të Zveçanit, Leposaviqit e Zubin-Potokut të hyjnë në objektet e ndërtesave komunale.

Pas të shtënave para komunës së Zveçanit, serbët e tubuar janë dëgjuar duke thirrur “ubij”, që në shqip do të thotë “vrite”.

Policia është futur në ndërtesën e Komunës së Zveçanit.

Policia po i asiston kryetarët e rinj të futen në objektet e komunave veriore
Policia e Kosovës ka dalë me komunikatë pas lëshimit të sirenave të alarmit në komunat veriore. Policia ka thënë se sipas autorizimeve ligjore dhe kushtetuese po ndërmerr veprimet e saja policore në ofrimin e sigurisë, ruajtjen e…
koha.net

​Digjen disa vetura të Policisë në Zveçan

Të shtëna armësh janë dëgjuar në Zveçan, ndërsa janë djegur vetura të Policisë.

Policia e Kosovës ka përdorur gaz lotsjellës për t’i shpërndarë qytetarët e mbledhur para objektit të Komunës së Zveçanit.

Gjatë ditës, Policia e Kosovës ka njoftuar se po asiston kryetarët e zgjedhur për të hyrë në objektet komunale./KosovaPress

Image
Kamionë e gurë te ndërtesa e Komunës së Leposaviqit

Dy kamionë janë vendosur tek ndërtesa e Komunës së Leposaviqit. Njëri nga ta ka qenë i ngarkuar me gurë, të cilët janë zbrazur tek ndërtesa e Komunës.

Përreth ndërtesës janë grumbulluar dhjetëra qytetarë serbë dhe po ftohen edhe të tjerë që t’u bashkohen. Ndërkohë që aty janë duke qëndruar edhe tri vetura të KFOR-it dhe dy autoblinda të Policisë së Kosovës.

Pjesëtarët e Policisë janë duke qëndruar në autoblinda.

Derisa të gjithë këto po zhvillohen është duke rënë shi shumë i madh. (Marigona Brahimi)