Ndahet nga jeta në moshë të re Besim Abdiu nga Strimnica e Tetovës. Lajmin e trishtë e ka publikuar Xhamia El-Hidaje në St. Gallen:
„Te Allahut jemi dhe tek Ai do te kthehemi!“
Na pikelloi tej mase nderrimi jete i vellait tone, dashamirit te kombit, te fese e te xhamise, Besim Abdi.
Allahu e paste meshiruar, ndersa familjes i dhurofte saber e force ne keto çaste te renda!
Në kujtim të paharruar- Besim Abdi nga Strimnica
Sot zemrat tona janë më të rënda, sepse u nda nga jeta një njeri i rrallë, miku ynë i dashur Besim Abdi. Pas një beteje të gjatë me sëmundjen, ai u nis drejt përjetësisë, duke lënë pas kujtime të çmuara dhe një boshllëk që askush nuk mund ta mbushë.
Besimi ishte nga Strimnica, por zemrën e kishte të shtrirë në çdo cep ku jetonin shqiptarë. Ai ishte më shumë se një mik – ishte një vëlla shpirtëror edhe i Veshallës dhe Veshallasve. Mori pjesë në festën “Votra jonë na bashkon 2022” dhe “Flamuri na bashkon 2022”. Ai vinte gjithmonë me zemër plot, me çiftelinë në dorë, duke thurur vargje plot humor, dashuri dhe krenari shqiptare.
Përveç kësaj, ai do të kujtohet gjithmonë për paraqitjet e tij të paharruara te Konaku i Pollogut, ku me fjalën e tij të ëmbël dhe çiftelinë e tij magjike i jepte jetë çdo mbrëmjeje. Atje, do të ndihet mungesa e tij si kurrë më parë.
Ai jetoi me kulturën e tij, e solli traditën shqiptare si një pasuri që duhej ruajtur, e ndau me të gjithë me zemërgjerësi.
I njohur si bamirës, gjithmonë i buzëqeshur e plot mirësjellje, Besimi e ndriçonte çdo vend ku hynte. Ishte njeri i shpresës, i cili edhe në ditët më të errëta gjente forcë të përcillte besim e gëzim tek të tjerët.
Sot, çiftelia e tij hesht, por melodia e shpirtit të tij do të mbetet përgjithmonë në kujtesën tonë.
Buzëqeshja, fjala e mirë dhe dashuria e tij për atdheun do të jetojnë në zemrat tona – aty ku Besimi do të jetë i gjallë përjetë.
Ngushëllime familjes, shokëve dhe miqëve. Zoti e mëshiroft Besimin dhe e shpërbleft me xhennet./veshalla.info
Shqip