Drejtoria e Doganave të Maqedonisë së Veriut ka shënuar një arritje historike gjatë muajit korrik, duke arritur nivelin më të lartë të arkëtimit të të hyrave të regjistruar ndonjëherë në shtet. Ndërtimi i një sistemi efikas gjatë dy viteve të fundit, nën drejtimin e menaxhmentit ku bën pjesë edhe Zëvendësdrejtori Mustafa Dauti, po jep rezultate konkrete në rritjen e aftësisë financiare të shtetit.
Sipas të dhënave zyrtare, vetëm gjatë muajit korrik janë arkëtuar 14,14 miliardë denarë. Kjo shifër shënon një rritje mbresëlënëse prej 1,5 miliardë denarësh ose 11,8% më shumë në krahasim me të njëjtin muaj të vitit të kaluar.
Bilanci pozitiv vazhdon edhe në nivelin kumulativ për shtatë muajt e parë të vitit. Nga fillimi i vitit deri në fund të korrikut, Drejtoria e Doganave ka grumbulluar gjithsej 80,5 miliardë denarë (rreth 1,3 miliardë euro). Ky rezultat përkthehet në 87,6 milionë euro më shumë të hyra për buxhetin e shtetit krahasuar me të njëjtën periudhë të vitit paraprak, duke konfirmuar konsolidimin e fuqishëm financiar dhe luftën pa kompromis ndaj evazionit.
Shqip